Претходен број

Стил

Во потрага по гробовите на Клеопатра и Марко Антоние

Гробот на Клеопатра никогаш не е пронајден, а археолозите сега откриваат докази дека свештениците го пренеле нејзиното тело во храмот на Озирис во Абусир, 50 километри западно од Александрија

Високо на еден рид со поглед на Средоземно Море, длабоко под обработените слоеви на карпестиот терен, во храмот на египетскиот бог Озирис, можеби се наоѓаат телата на египетската кралица Клеопатра и нејзиниот љубовник Марко Антоние. Оваа вест минатата недела ја возбуди археолошката јавност, но и целиот свет кој барем ја наслушнал легендата за едни од најпознатите љубовници и моќни владетели во историјата на светот или барем го гледале филмот „Клеопатра“ со Елизабет Тејлор и Ричард Бартон.

Гробот на Клеопатра никогаш не е пронајден, а археолозите сега откриваат се' повеќе и повеќе докази дека свештениците на Клеопатра го пренеле нејзиното тело во храмот на Озирис во Абусир, 50 километри западно од Александрија.

„Тоа би можело да биде најважното откритие на 21 век. Ова е совршено место за криење“, им изјавил главниот египетски археолог Захи Хавас на странските новинари водејќи ги во обиколка на храмот.



Археолозите од Египет и од Доминиканска Република планираат наесен да започнат со ископувања, во потрага по гробот. Засега, со помош на радари се лоцирани три комори, приближно 20 метри под површината на храмот. Историчарите веруваат, врз основа на пишувањата на грчкиот хроничар Плутарх, дека Клеопатра и Марко Антоние биле закопани заедно.

Неодамна, археолозите во близината на храмот пронашле гробови со неколку позлатени мумии, што навестува дека во близина се наоѓаат гробови на кралско семејство. Претходно пронашле монети со ликот на Клеопатра и некои работи кои би можеле да му припаѓаат на Марко Антоние.

Но, ископувањата не може да почнат до есен од безбедносни причини, зашто во близина се наоѓа викендичката на египетскиот претседател Хосни Мубарак.



Во случај навистина да бидат пронајдени гробовите, археолозите очекуваат телото на Клеопатра да биде балсамирано, но она на Марко Антоние веројатно - не, зашто тој не бил ниту Египќанец ниту крал. Стручњаците досега претпоставувале дека Клеопатра била закопана во Александрија, на локација која денес се наоѓа длабоко под морето.

Клеопатра била египетска кралица, од династијата на Птоломеите, а самоубиство извршила во 31 година пред нашата ера, откако римскиот цар Октавијан го поразил нејзиниот љубовник и сојузник, бившиот римски генерал Марко Антоние. Потоа Октавијан го окупирал Египет. (Ј.П.)