Претходен број

„Телеком“ ги укинува бесплатните сто минути

Корисниците на „Македонски телеком“ од 1 јули ќе ја изгубат можноста од стандардниот пакет за бесплатни сто минути, за што, пак, како што велат од „Телеком“, ќе добијат многу други поволности. Во нив спаѓа веќе воведената можност за неограничени разговори во вечерните часови со дополнителна претплата од 199 денари и поволностите на тарифниот модел „Кол фри“, со кој корисниците добиваат до 58 проценти поевтини разговори во странство и неограничени разговори со „Кол фри“ пријателите.

Покрај веќе понудените нови пакети по ребрендирањето „Кол комфорт“ и „Кол фри“, од 1 јули „Телеком“ најавува дека корисниците ќе може да користат уште една поволност - да одберат еден број од фиксната телефонија со кој ќе разговараат за 50 проценти поевтино и еден број од мобилните оператори со 50 проценти намалување за броевите кон „Т-мобиле“ и кон „Космофон“. Додека за број кон операторот ВИП намалувањето е 20 проценти. Во завршна фаза е проект и за воведување картичка за лојалност, која на корисниците ќе им носи бодови, а за кои ќе добиваат одредени награди. Од септември од „Телеком“ го најавуваат и стартот на Интернет-телевизијата која ќе биде по достапни цени. (М.Т.)