МВР ќе помогне да се види дали Игор и Мартин се познавале

МВР стои на располагање за обезбедување на сите потребни податоци околу шпекулациите дека „тигарот“ Игор Спасов од поодамна имал нерасчистени сметки со 22-годишниот Мартин Нешкоски, кого пред речиси три недели го претепа до смрт на плоштадот „Македонија“ во центарот на Македонија. Братот на Нешкоски пред неколку дена за медиумите изјави дека Спасов бил еден од полицајците што му се заканувале на Мартин да сведочи во полза на „алфите“, кои пред негови очи ��ретепале 38-годишен скопјанец. Наводно, Нешкоски бил принуден пред судот да ги претстави „алфите“ како жртви. Скопјанецот ги тужел полицајците што го претепале, по што едниот од нив бил казнет парично, а другиот ослободен поради немање доказ. Од друга страна, „алфите“ поднеле кривична пријава против скопјанецот за напад врз полицајците и управување возило под дејство на алкохол, за што бил осуден на шестмесечна затворска казна. Токму Мартин бил еден од сведоците, кој морал да ја изврти вистината, тврдеше неговиот брат. Министерката за внатрешни работи, Гордана Јанкулоска, потврди дека се воделе две паралелни судски постапки, кои завршиле со пресуда.

„Доколку некоја од странките во постапката преку соодветна правна процедура побара повторување, МВР целосно стои на располагање во смисла на обезбедување на податоците, утврдување на фактичката состојба и сето она што е надлежност на МВР“, изјави Јанкулоска. (Г.А.)