Странци ќе ни носат странски инвеститори

Откако се виде дека не оди лесно полнењето на слободните зони со фабрики, сега Владата ќе ги дава под закуп

Соња Маџовска



Откако се виде дека не оди така лесно полнењето со фабрики на слободните економски зони, сега тие ќе се даваат под закуп. Владата ќе бара мултинационални компании што веќе се занимаваат со развој на вакви индустриски зони, за да донесат инвестиции во земјава. Ова вчера го потврди министерот за економија Фатмир Бесими, според кој, допрва ќе се прецизираат деталите како ќе се реализира оваа идеја и на колку години ќе се даваат под концесија зоните.

Пред извесно време и првиот човек на Дирекцијата за технолошки индустриски развојни зони, Марјан Јованов, најави дека тие веќе разговарале со заинтересирани менаџери од Турција и од Индија за оваа идеја. Но, според него, за да може тоа да се реализира прво зоните мора да имаат изградено инфраструктура.

„Планираме во делот на слободните економски зони да примениме нов пристап за концесионирање, односно зоните ќе ги дадеме под закуп на некој што има искуство да ги развие тие зони и да привлече инвеститори. Тоа би бил нов модел, за разлика од тоа што сега го прави сама Дирекцијата за технолошки индустриски развојни зони. Мислам дека ова е добра идеја, но потребни се дополнителни анализи за да се донесе конечна одлука на Влада. Кога ќе се донесе одлуката ќе се дефинираат и условите и концептот, а тоа ќе оди транспарентно на меѓународен јавен оглас“, изјави вчера министерот Бесими.

Тој е оптимист дека странските инвестиции што засега само се најавуваат, сепак, ќе дојдат во втората половина од годинава. Министерот не прецизираше за кои компании е сигурен дека ќе почнат да ги реализираат инвестициите. „Треба уште да работиме во делот на привлекување инвестиции и подобрување на деловната клима. Годинава и претходната имаше многу екстерни фактори што влијаеја на тој елемент, но во иднина со подобрување на одредени политики ќе може да се подобри квалитетот на инвестиции“, изјави Бесими.

Тој очекува да се подобри инвестициската слика за земјава, но засега фактите зборуваат нешто друго. Бројките за СДИ во земјава се поразителни. Лани ја завршивме со 180 милиони евра странски инвестиции, а во првите два месеца од годинава се влезени само 14 милиони евра СДИ. Инаку, според планот на Владата, во земјава треба да никнат вкупно 11 слободни економски зони во повеќе градови низ земјава. Покрај двете зони во „Бунарџик“, 1 и 2, почната е и изградба на уште една поголема технолошко-индустриска развојна зона во Штип, следна е Тетово, а тука се и зоните на локалните самоуправи. Во „Бураџик 1“ сега работат само две фабрики „Џонсон контролс“ и „Џонсон Мети“.

Сепак, и покрај поразителните бројки, странските организации што ја мерат бизнис-климата во земјите од регионот постојано потенцираат дека Македонија е топ-реформатор. И вчера на презентацијата на извештајот за индексот на инвестициски реформи ИРИ 2010 изработен од ��ЕЦД, беше констатирано дека земјава бележи напредок по сите параметри. Сепак, шефот на повелбата за инвестиции за Југоисточна Европа на ОЕЦД, Алистер Нолан, кажа кои се и слабостите. „Забележуваме дека приватниот сектор во Македонија се жали оти постои некаков јаз меѓу вештините што се обезбедуваат во образовниот систем и оние што им се потребни. Исто така, треба да се обрне внимание и на општиот квалитет на образованието за инвестиции“, изјави Нолан. Според него, Македонија има и низок пристап до финансии и низок резултат на наоѓање капитал. Во извештајот се констатира дека земјите од ЈИЕ треба да привлечат повеќе и поквалитетни инвестиции за да се извлечат од кризата и да изградат основа за долгорочен раст. Со индексот на инвестициски реформи се прави процена на политиките и на институциите што суштински влијаат на климата за инвестирање во 10 економии од регионот.