Претходен број

Бендевска треба да плати 11.000 евра за клевета на Коњановски

Битолскиот суд ја осуди пратеничката за клевета на ексдиректорот на РЕК

БИТОЛА - Пратеничката Весна Бендевска е виновна за клевета во спорот со поранешниот директор на РЕК „Битола“, сега министер за одбрана Зоран Коњановски и треба да плати отштета од над 11 илјади евра. Вака пресуди Основниот суд во Битола и ја задолжи Бендевска да плати глоба од 81,750 денари како сторител на делото клевета. За нанесената душевна болка на министерот Коњановски, што го нарече рекордер по неуспеси во РЕК „Битола“, треба да му исплати 530 илјади денари и плус судските трошоци.

Бендевска најави дека за ваквата пресуда ќе бара правда од повисоките судски инстанции, зашто смета дека судењето било пристрасно и под притисоци. И самата судијка Мери Радевска по изрекувањето на пресуда призна дека спорот се одвивал под силни притисоци, како политички, така и од медиумите, но се потрудила непристрасно да суди. Министерот Коњановски не дојде на судењето, но најави дека парите ќе ги донирал во хуманитарни цели.

На вчерашното рочиште адвокатот на обвинетата Бендевска ја извести судијката Радевска дека до Судскиот совет и до Министерството за правда поднел претставка за преиспитување на нејзините морални и стручни квалитети како судија, за подоцна бранителот на Бендевска да побара нејзино изземање од случајот. Но, претседателот на Основниот суд од Битола одлучи Радевска да го продолжи судењето.

,,По моите проценки, одредени судии судат од позиција на сила и по порачка. Во моето барање до Судскиот совет доставив писмени докази каде што судијката има преправено записник за главен претрес и врз основа на тој записник има донесено пресуда. Затоа барав да се преиспита нејзината моралност и стручност. Побарав и изземање на судијката, но таа наместо да го извести судот, продолжи со судењето. Тоа е спротивно на Кривичниот законик“, изјави Јован Божиновски, адвокат на Бендевска.

Пред судот, на изненадување на обвинетата, повторно се појави психијатрискиот вештак Изабела Филоф. Наспроти првото вештачење на душевната состојба на Коњановски, кога тврдеше дека душевната болка не може да се градира, но дека тој ја претрпел многу силно поради што две недели бил под седативи, таа сега образложи дека анксиозноста има статус на лесно психичко растројство и дека не предизвикува нарушувања во извршувањето на функцијата и работните обврски кај министерот.

Промената на ставот на вештакот ја револтира обвинетата. ,,Денеска се случи скандалозно повторување на вештачењето од страна на психијатрискиот вештак. Не знам по чија нарачка. Претходниот пат таа три часа не' убедуваше дека министерот има дијагноза анксиозно растројство. Сега, претпоставувам под притисок на јавноста, која почна се' погласно да го поставува прашањето за подобноста на Коњановски во вршењето на функцијата министер за одбрана, вештакот не' убедува сосема спротивно, дека неговата анксиозност од оваа временска дистанца не претставува проблем да министерува“, рече Бендевска.

За претрпената душевна болка министерот Коњановски бара од Бендевска отштета од 33 илјади евра, како и објавување на пресудата во дел од македонските медиуми и тоа на централните вести.

,,Семејствата на мировниците побараа од мене, доколку министерот Коњановски е присутен на судењето, да го прашам: смета ли дека душевната болка што ја претрпеа најблиските на загинатите мировници може да биде искомпензирана со отштета од 2 илјади евра, а самиот лично заради партиски прес смета дека неговата душевна болка чини токму 33 илјади евра“, праша Бендевска.

Во завршните зборови бранителот на Коњановски, адвокатот Дарко Стефановски, цврсто стоеше на ставот дека Бендевска го извршила кривичното дело клевета и за тоа треба да одговара. ,,Обвинетата со самиот исказ дека дополнително не можела да добие податоци за работењето во РЕК додека директорувал Коњановски, врз кои таа ги темелеше своите искажувања, призна дека на пресот не користела официјални податоци. Материјалните докази покажаа дека не е точно она што го тврдеше Бендевска“, изјави Стефановски.

Коњановски ја тужи пратеничката на СДСМ, бидејќи пред една година на прес-конференција за време на избори го посочи како рекордер по бројот на хаварии во РЕК „Битола“. (А.Б.)