Грчкото лоби стаса до Скопје, македонското во илегала

Атина го активира своето најтешко политичко оружје: емисари во Скопје

Соња Крамарска

Атина го активира своето најтешко политичко оружје во битката за името Македонија - емисари со препознатлив политички профил во Скопје ја убедуваат овдешната јавност дека е неопходен компромисот околу името на нашата земја. На нивната кампања може да се препознае потписот на владата на премиерот Јоргос Папандреу, бидејќи тие отворено се залагаат нашата земја да го прифати името Северна Македонија.

Поранешниот грчки амбасадор во Македонија, Александар Маљас, креаторот на грчката политика кон спорот за името, Евангелос Кофос и Танос Веренис, некогашен директор на грчката фондација за одбрана и надворешна политика - се личностите што деновиве престојуваат во Македонија во убедувачка мисија.

Интересно е што во оваа група се наоѓа Веренис, кој во почетокот на 1990-тите години, кога изби спорот меѓу Македонија и јужниот сосед, застана на страната на нашата земја. „Грчките политичари немаат храброст да и' признаат на својата јавност дека не можат да го блокираат името засекогаш. Се плашам дека сево ова ќе предизвика натамошна психолошка изолација на Грците од Западот“, велеше тогаш Веренис.

Но, сега времињата се сменија и Грција се однесува како да е на чекор до победата во овој спор и затоа, очигледно, ја спушта топката од дипломатско убедување на јавната сцена во суптилно убедување на македонските новинари, кои го создаваат амбиентот за исходот од процесот на преговорите. Поентата на гостите од Атина е дека сите досегашни гарнитури на власт во Македонија биле за постигнување договор со Грција, што за нив е доказ дека не е македонското општество тоа што се противи на компромисот, туку само Груевски и групата околу него.

Kаков е одговорот на македонската политика на овие очигледни грчки провокации и коренита промена во нивната тактика што има цел да придонесе кон измена на климата во Македонија во полза на грчките барања?

Вчера македонското Министерство за надворешни работи, чиј шеф Антонио Милошоски е меѓу прозваните од страна на емисарите оти беше портпарол на поранешната влада на Љупчо Георгиевски, која се согласи(ла), според нив, на името Горна Македонија, се огласи со куса реакција.

„Лицемерно е грчките позиции да се претставуваат како компромис“, гласи реакцијата. Лицемерно е, одговара македонската дипломатија, грчките ставови и црвени линии да се пакуваат и да се нудат во јавноста како компромисни решенија. „Ова е само продолжување на политиката на едностран пристап во еден билатерален проблем, кој треба да се реши со еднаков придонес од двете страни“, реагира МНР.

Дали е таквата реакција е доволна за да се даде одговор на се' поагресивните грчки лобирања, кои, ете, стасаа и до Скопје и го засилуваат впечатокот дека македонската страна е во длабока илегала. Премиерот Никола Груевски, кој има шанса да им парира на грчките лицитации на конференцијата во Атина, што ја организира британски „Економист“ – се' уште се двоуми дали да присуствува таму. И тоа во ситуација кога „Економист“ се заинтересира за спорот околу името и отворено ги протежира македонските позиции. Од Кабинетот на Груевски вчера ни рекоа дека се вршат подготовки за пат за Атина, но не се знае дали премиерот ќе отпатува таму.

Гостите од Грција, кои официјално се дојдени како претставници на тамошна тинк-тенк организација, ќе престојуваат во нашата земја неколку дена. Во финалето на нивниот престој ќе земат учество во проект на телевизија А1 во кој ќе биде изведена симулација на преговорите меѓу македонската и грчката страна. За денеска, пак, како што ни рече новинарот Борјан Јовановски, кој ќе ја води симулацијата, е предвидена уште една дебата околу името на која овој пат ќе присуствуваат грчки новинари.

„Војната“ околу името, очигледно, добива нови димензии, а македонската страна се покажа и за тоа неподготвена. Освен гостувањето на универзитетскиот професор и поранешен шеф на дипломатијата, Љубомир Фрч��оски, на универзитетот „Пантео“ во Атина во јуни 2008 година, друга посета од таков вид не е остварена. Фрчкоски тогаш одржа предавање за спорот околу името по покана на Катедрата за политички науки и историја на атинскиот универзитет. Десничарска студентска организација се обиде да го спречи настапот на македонскиот професор, но не успеа во тоа.

Во Атина и во Солун можат да се сретнат многу културни работници од Македонија, кои своите куси престои таму ги користат и да ја претстават македонската позиција во овој спор, но тие не можат да бидат ни приближно успешни, како што се „политичките булдожери“ што ги праќа Папандреу во Скопје.