Црвенковски закажа седница на Советот за безбедност

Претседателот Бранко Црвенковски и неговиот колега од Албанија, Бамир Топи, разговараа за безбедносните прашања, особено во заедничкиот граничен појас

За зголемените тензии во регионот влијае и прашањето за Косово, смета македонскиот претседател

СИМОН ИЛИЕВСКИ

ОХРИД - В среда во 14 часот ќе се одржи седница на Советот за безбедност на Република Македонија на која ќе се расправа за актуелната безбедносна состојба, соопшти вчера во Охрид претседателот Бранко Црвенковски по средбата со претседателот на Албанија, Бамир Топи. На седницата ќе се направи анализа на најновите информации на надлежните органи по што, како што најави Црвенковски, ќе се донесе оцена за влијанието на последните инциденти на границата со Косово и на Шар Планина врз општата безбедност на државата.

„Факт е дека во последно време зачестија инцидентите на границата со Косово и според информациите на МВР, причините се бараат во дејствување на поединци и криминални групи. Јас не сум сигурен дека може да се отфрли и причината дека за зголемување на тензиите во регионот е и прашањето на Косово“, рече претседателот Бранко Црвенковски.

Во врска со финалниот статус на Косово, претседателот Црвенковски изјави дека за Македонија најдобра солуција е статусот на Косово да се определи со резолуција на Советот за безбедност на Обединетите нации, а ние како земја- кандидат ќе ги почитуваме и одлуките на ЕУ и на НАТО. Најкусо речено, ние ќе го почитуваме она што како став ќе се донесе во Брисел, а не она што ќе се одлучи во Приштина“, рече Црвенковски.

Новинарите побараа и одговор за шансите на Македонија за добивање покана за влез во НАТО и за можноста од вето од страна на Грција. „Ние веруваме дека ќе добиеме покана за НАТО, но не треба само да веруваме туку треба и да го одработиме нашиот дел, што важи и за Албанија и за Хрватска“, рече Црвенковски. „Во согласност со Привремената спогодба од 1995 година Грција, доколку ја почитува, нема основа да го попречува интегрирањето на Македонија во НАТО или која било друга меѓународна институција“, додаде Црвенковски.

„Решавањата на проблемот со употребата на знамињата на етничките заедници не треба да се бара во непочитувањето на Одлуката на Уставниот суд, туку треба да се најде соодветно законско решение во рамките на правниот систем“, смета претседателот Црвенковски. Тој упати порака до власта и до опозицијата заеднички да најдат такво решение и да го донесат со консензус, нудејќи им помош доколку сметаат дека ќе им биде потребна.

Влезот во НАТО и во ЕУ и продлабочувањето на меѓусебната соработка беа главни теми на вчерашната средба на претседателот Црвенковски со претседателот на Албанија, Бамир Топи, што се одржа во вилата „Билјана“ во Охрид. Двајцата претседатели рекоа дека, покрај политичката соработка, ќе ја унапредуваат и економската и ќе работат на проектите во областа на инфраструктурата, како што се Коридорот 8 и проектот АМБО. Особено внимание рекоа дека ќе обрнат и на безбедносните прашања особено во заедничкиот граничен појас и борбата против организираниот криминал.