Двајца тетовци киднапирале сограѓанин поради врски со нивните сопруги
Грабнатиот побегнал скокајќи од автомобил во движење
ТЕТОВО - Бурим И. (21) од Тетово се извлекол од најлошото благодарение на снаодливоста и жртвувањето, скокајќи од автомобил во движење.
Претходно, во угостителски објект во Тетово, Рамадан Р. (30) и Агим К. (31) се сретнале со Бурим И., со кого „пријателски“ разговарале и го убедиле да продолжат да се дружат на Попова Шапка. Некаде пред селото Гајре грабнувачите ја кажале вистинската причина за грабнувањето. Откако откриле дека Бурим бил во врска со нивните сопруги, му наредиле да се самоубие, зашто во спротивно тие ќе го стореле тоа. За да го убедат дека намерата им е сериозна, го сопреле возилото покрај некоја бездна и го терале да скокне. Бурим ја одбил наредбата, а заедно продолжиле кон Попова Шапка. Во возилото, едниот од киднаперите го удирал со тупаници, а другиот извадил пиштол заканувајќи му се дека ќе пука. Во еден момент, некаде пред Лисец, Бурим успеал да ја отвори вратата од автомобилот што се движел кон нагорнината, скокнал, повредувајќи ги рацете и телото, но истовремено продолжил да бега, при што, бидејќи било темно, успеал и да се скрие. Кога стигнал во Тетово, го пријавил случајот во полиција. Двајцата грабнувачи биле пронајдени и приведени и по информативниот разговор во полицијата во Тетово тие се пуштени на слобода, но крајниот епилог е кривична пријава против Рамадан и Агим за грабнување. (Г.Е.) |
