Претходен број

Тивкиот непријател на Владата и на премиерот

Според анкетата на Институтот „Павел Шатев“ 40 проценти се задоволни од Владата

Соња Крамарска

Опозицијата во државава ги збива своите редови, но тоа не е командувано од „Бихаќска“ 8 каде што е лоциран штабот на социјалдемократската левица, туку од невидлив центар, кој се нарекува граѓанска пасивност и одбивање да се вклучат во еуфоричното владеење на десницата и нејзиното жестоко стампедо од гласачи и симпатизери. Најновите резултати од анкетата на партискиот институт на ВМРО-ДПМНЕ „Павел Шатев“ покажа дека 42,9 проценти од испитаниците сметаат дека нашата земја се движи во правилна насока.

Несомнено дека овој податок е причина за задоволство на Владата и на премиерот Никола Груевски, бидејќи искажува поддршка на политиката на владејачката партија ВМРО-ДПМНЕ. Меѓутоа, во истиот дел на одговорите на прашањето „дали Македонија се движи во правилна или во погрешна насока“ има и други бројки, кои можат да дадат повод за загриженост доколку внимателно се анализираат.

Додека 42,9 проценти искажуваат задоволство од правецот во кој се движи Македонија, истовремено 34,2 проценти на истото прашање одговориле со „не“, односно дека не го одобруваат патот по кој оди земјата, а други 22,9 проценти одговориле со „не знам“ или одбиле да одговорат. Ако се соберат последните две бројки излегува дека 57 проценти сметаат дека не се движиме во правилна насока или од некоја причина се воздржани, но во секој случај не ја поддржуваат политиката во земјава. Споредено со 42,9 проценти поддржувачи, бројката на оваа „пасивна“ опозиција е многу поголема.

Дали опозициската левица ќе успее да ги придобие овие граѓански групи чиј голем процент несомнено претставува прикриена закана за Владата и ја етикетира како политичко мнозинство во парламентот, а политичко малцинство во земјата, е сосема друго прашање. СДСМ, како левоориентирана партија се обидува повторно да се приближи кон работниците и кон нивните синдикати, што и' го свртеа грбот по големиот број мерки што ги носеа сдсмовските влади, а кои доведоа до осиромашување на средниот слој на населението, кој по правило е поблизок до социјалдемократските партии. Но, засега се чини дека тоа е безуспешно.

Освен задолжителните прашања за популарноста на партиите ВМРО-ДПМНЕ и СДСМ (во сооднос 26,1 и 9,2) и на политичарите (Груевски 27,3 а Црвенковски 9,3), во кои сосема очекувано продолжува триумфалниот поход на владејачката ВМРО-ДПМНЕ и на нејзиниот партиски лидер и актуелен премиер Никола Груевски, анкетата на „Павел Шатев“ дава уште една потврда за скриениот непријател на Владата.

На прашањето „како ги оценувате последните министерски смени во Владата позитивен одговор дале 40,2 процента испитаници, но негативен одговор или одбегнале да дадат одговор има кај 30,2, односно 29,6 проценти, што дава слика за 60 проценти што не се задоволни или не сакаат да кажат, наспроти 40 проценти што се задоволни од кадровските смени.

Патем, погодете кој го има последното место на рејтинг-листата на политичарите во земјава што излезе вчера од партискиот институт на ВМРО-ДПМНЕ „Павел Шатев“? Се разбира, тоа е претседателот Ѓорге Иванов со 0,9 проценти популарност наспроти 27,3 проценти популарност на партискиот шеф Груевски. Кабинетот на претседателот, по последната анкета на Интернационалниот републикански институт (ИРИ), се јави со негодување кон оние што ја пласирале анкетата во која Иванов повторно е на дното, со алузија дека намерно се прават манипулации за негово изолирање. Нема информации како претседателот Иванов ги дочекал вчерашните најнови резултати.

Но, и Груевски не треба да покажува триумфализам, бидејќи, според бројките на вчерашната анкета на „Павел Шатев“, иако бил почестен со епитетот најпопуларен со 27,3 отсто, процентот на оние што сметаат дека ниту еден од актуелните актери на политичката сцена не го заслужува нивниот глас е 28,6 а на оние што рекле дека „не знаат“ или „немале одговор“ е 17,8 отсто или вкупно околу 46 проценти излегува дека не сакаат влезница за

клубот на обожаватели на премиерот Никола Груевски.

Инаку, социјалдемократите вчера, со доза на цинизам, коментираа дека Груевски, незадоволен од анкетата на ИРИ што првпат во последните три години покажа пад на неговата популарност, побрзал да направи своја анкета во која повторно ќе триумфира. Зошто не ги прашате граѓаните дали сега подобро живеат со вашата политика и какви оцени и' даваат на Владата за справувањето со економската криза, провоцираат тие, завршувајќи ја својата писмена реакција со сочниот коментар дека на премиерот се' уште му е најважно мерењето на неговата лична популарност.

ВМРО-ДПМНЕ возврати со обвинувањата адресирани до премиерските години на Црвенковски и долгата транзиција за која сметаат дека тој е виновен.

Скриениот непријател засега се' уште молчи и ги чека следните анкетни листови за да го каже своето мислење за Владата. Она што веќе е видливо е дека тоа мислење нема да му биде по волја на премиерот Никола Груевски.