Претходен број

Софија држи тензија околу случајот „Спаска Митрова“

фото „24 Часа“

Документацијата за судската постапка за случајот МНР ќе ја достави на увид кај бугарските власти

Димитар Чулев

„Министерството за надворешни работи со реакцијата во средата одговори на вербалната нота од бугарското МНР. Откако Министерството за правда на Република Македонија ќе ја изготви документацијата за судската постапка во случајот ’Спаска Митрова‘, МНР ќе ја достави на увид кај бугарските власти“.

Ова е вчерашниот дополнителен одговор на вчерашните обвинувања од официјална Софија дека Македонија не одговорила на вербалната нота што и' беше упатена во понеделникот попладне на в.д. амбасадорката во Софија, Дивна Тричковска. На средбата со Тричковска бугарските власти изразија „загриженост“ дека „нивната државјанка“ Спаска Митрова, која е упатена на издржување затворска казна, била осудена само поради тоа што е Бугарка.

Портпаролот на бугарското МНР, Драговест Горанов, за агенцијата Фокус вчера изјави дека „засега нема ниту писмен ниту усмен одговор од македонските власти. Рокот за одговор на нотата е околу една седмица. Ако не добиеме одговор имаме и други можности и средства за да го поставиме прашањето“, рече Горанов.

И во оваа изјава портпаролот на МНР не се обиде да ја прикрие заканата упатена до македонските власти дека Бугарија ќе го следела однесувањето на Македонија и ќе ја оценувала готовноста на земјата да ги изврши промените потребни за европската интеграција на Република Македонија. „Ние треба да ги исцрпиме сите можности и да добиеме јасен одговор од македонските власти дали тие имаат желба да станат членка на ЕУ, за што е потребно да ги исполнат барањата. Ние следиме дали тие ќе одговорат на таквите барања. За нас е подобро да ги научиме да ги почитуваат, а не да поставуваат пречки“, рече Горанов.

За нотата портпаролот рече дека треба да се толкува од аспект на поактивната политика на новата влада на Софија кон сонародниците надвор од територијата на Бугарија. „Новата бугарска влада е цврсто решена да декларира појасна заштита и поддршка на граѓаните со бугарско национално чувство, што живеат надвор од матичната држава“.

„Приказната“ на Спаска Митрова и вчера беше третирана како топ-тема во дел од бугарскиот печат. Весникот „24 часа“ открива нов детаљ дека затворената Бугарка имала тумори на двете гради, а оти бугарскиот министер без портфолио, Божидар Димитров, одговорен за Бугарите во странство „лично се ангажирал да обезбеди бесплатна хируршка интервенција“ во Бугарија. Новинарите на весникот се пуштија во вистинска потрага за да откријат каде се наоѓало детето на Митрова и „открива“ дека соседите на нејзиниот поранешен сопруг, Воислав Савиќ, сериозно се сомневаат оти тој некаде се алкохолизирал, дури и „дека некаде шмрка дрога“.

„24 часа“ го поставува прашањето дали може да се постигне договор Спаска да ја одлежи казната во Бугарија, а неименувани дипломатски извори велат дека тоа не би претставувало голем проблем, бидејќи „таа е бугарска државјанка иако е осудена по македонски закони“. Но, тоа не се разгледува како опција, бидејќи во бугарски затвор жената не ќе можела да биде со своето дете.

Казната на Митрова и' е изречена поради непочитување на решението на Центарот за социјални работи од Гевгелија да му дозволи на својот поранешен сопруг да ја посетува нивната двегодишна ќерка.

Спаска Митрова во 2007 година е судена за кривично дело насилно одземање на малолетно лице, за што е осудена на казна три месеци затвор, но откако на последното рочиште на 14 јуни оваа година не се појавила во женскиот оддел на КПД „Идризово“ за да ја одлежи казната била приведена на 30 јули. Во овој период таа поднела документи за бугарски пасош, дури станала член и на движењето „Радко“, што на случајот му даде политичка тежина дотаму што бугарските власти отворено се заканија дека ја разгледуваат можноста да го попречат приклучувањето на Македонија кон ЕУ поради третманот не само на Спаска Митрова, туку и кон други македонски граѓани со бугарска самосвест, кои биле изложени „на административен полициски и друг притисок само поради својата национална припадност“.

Во завчерашната реакција на македонското МНР на бугарската нота беше побарано „двете држави да не дозволат злоупотреба на државјанства и на пасоши како алиби за бракоразводни проблеми или затајување данок... Очекуваме бугарските власти да се дистанцираат од оваа класична манипулација со човечки судбини“, се вели во реакцијата.

Министерството за правда со детали за случајот со Митрова

Министерството за правда вчера изнесе податоци со хронолошки преглед на судската постапка за случајот на осудената Спаска Митрова. За случајот на Митрова од Гевгелија во континуитет од 2007 година пред Основниот суд Гевгелија се водат кривични постапки за кривично дело одземање малолетник по член 198 став 1 од Кривичниот законик. За тој предмет е донесена пресуда од 2 јули 2007 година со која на Спаска Митрова и е изречена условна осуда при што и е утврдена казна затвор во траење од 6 месеци која нема да се изврши доколку осудената во рок од една година не стори ново кривично дело, соопштува Министерството за правда повикувајќи се на податоци од Основниот суд во Гевгелија. По правосилноста на пресудата, осудената поднела барање за вонредно преиспитување на правосилната пресуда кое е отфрлено со решение на Врховниот суд од 3 јуни 2008 година. Основниот суд Гевгелија на 29 септември во 2008 година го одбил барањето на Спаска Митрова за повторување на постапката како неосновано, а такво решение донел и Врховниот суд на 28 април годинава. На крајот на 2007 година на Митрова повторно и е изречена условна осуда за истото кривично дело при што и е утврдена казна затвор од 8 месеци која нема да се изврши доколку во рок од 2 години не стори ново кривично дело. Таа пресуда станала правосилна на 17 мај минатата година.