Претходен број

МАНУ им одговори на професорите што му пишаа на Обама

„Името на Македонија е стварноста на Македонија“, стои во реакцијата на МАНУ

Македонската академија на науките и уметностите реагираше на писмото на повеќе професори главно со грчко потекло упатено до американскиот претседател Барак Обама, во кое се негира македонскиот идентитет и се бара промена на државната политика кон Македонија. Македонските академици во своето писмо наведуваат дека чувствуваат потреба да реагираат на писмото на професорите од разни универзитети во САД, Канада и Европа и се изненадени од нивната неакадемска реторика. Во него тие побарале од Обама да преземе мерки „да се исчисти политичкиот отпадок оставен во Југоисточна Европа од претходната администрација на САД“ и не само што се негира идентитетот на македонската нација туку и инхерентното и цивилизациско право Македонија да се вклучи во интегративните системи на современиот демократски свет.

„Како луѓе на науката, па следствено како застапници на објективната аргументација, на кохерентна интерпретација на факти, на етиката и на правдата, членовите на МАНУ не можат да ја прифатат логиката на невидената уцена што ја наметнува Република Грција околу легитимното име на својот мирољубив и пријателски сосед. Тоа македонско име е многувековно колективно чувство, артикулирана автоперцепција и самосвест на македонскиот народ“, се вели во реакцијата на академиците.

Македонската нација е општопризната како една од јужнословенските нации, македонскиот јазик е признат како рамноправен во групата словенски јазици и се проучува на славистичките катедри на универзитетите во светот, а својата национална припадност ја изразуваат и стотици илјади Македонци кои живеат во соседните држави, како и во САД, Канада, Европа и Австралија, се додава во писмото-одговор.

На крајот од реакцијата на МАНУ се изразува убеденост дека проблематизирањето на повеќедецениското постоење на државната творба под името Република Македонија е во спротивност со историските реалности на модерна Европа.

„Тие вредности се заедничко наследство и стремеж и на Република Македонија и на Република Грција. Затоа и ние се залагаме за што побрзо надминување на атавизмите од минатото на патот кон обединета и просперитетна Европа. Апсурдно е на тој заеднички пат да се бара од нас да се откажеме од сопственото многувековно име и од самите себе. Името на Македонија е стварноста на Македонија“, стои во реакцијата на МАНУ. (Св.У.)