Насловна

Потекло

Во вените на Шакира тече македонска крв

Популарната колумбиска пејачка влече македонски корени од страната на татка си. Нејзината баба Македонка се омажила за Либанец

Иако е тешко да се поверува дека светската музичка ѕвезда Шакира и нашата земја имаат нешто заедничко, веќе на втора рака информациите изгледаат сосема поинаку. Трагајќи по потврда или демант на се погласните шпекулации ��а наводните македонски корени на популарната колумбиска пејачка, наидовме на повеќе информации што говорат токму во полза на вистинитоста на информацијата.

Приказната дека Шакира е Македонка од страната на татка си, Вилијам Мебарак Чадид, кој по потекло е половина Либанец, а половина Македонец, се потврдува и на официјалната веб-страница на „Фокс њуз“ каде што е наведено неговото македонско потекло. Неофицијално, и самата Шакира за време на неодамна одржаниот концерт во Бејрут, кој му го посвети токму на својот татко, кажала дека тој е половина Либанец, а половина Македонец.

Истата информација може да се прочита и на официјалната страница на холивудскиот музеј на восочни фигури „Мадам Тисо“ каде што колумбиската дива е претставена како дете на татко Американец со либанско и македонско потекло.

Се претпоставува дека дедото на Шакира бил Либанец, кој се оженил со Македонка, а нивниот син се родил во Америка и подоцна заминал за Колумбија и продолжил да живее и работи во Баранкила, каде што подоцна се оженил со Нидија дел Кармен Рипол Торадо. Нидија била негова втора жена и мајка на Шакира со италијанско и со шпанско потекло, додека пејачката е нивна единствена ќерка и осмо дете на Вилијам, кој имал седум деца од претходниот брак.

Шакира Изабел Мебарак Риполи, како што е нејзиното целосно име, е родена на 2 февруари 1977 година во Баранкила, Колумбија. Со продадени над 50 милиони копии од албумите, таа е најпродаваниот колумбиски артист на сите времиња. Шакира не е само убаво лице - нејзиниот коефициент на интелигенција е 140, студирала на УКЛА и зборува неколку странски јазици. (К.Ш.)