Претходен број

Ги снема пријавите за тепачите на плоштадот

МВР тврдеше дека поднело 23 пријави, но во Одделот за прекршоци во Скопје не примиле ниту една

Горан Адамовски


Силеџиите што се пресметаа физички пред четири недели со студентите што протестираа поради изградба на верски објект на плоштадот „Македонија“ не одговарале ниту прекршочно. Иако три дена по инцидентот, МВР најави дека поднело прекршочни пријави против 23 лица, во Одделот за прекршоци до вчера не добиле ниту една пријава од полицијата.

„До Одделот за прекршоци нема пристигнато пријави од МВР за инцидентот на плоштадот во Скопје“, ни изјави вчера портпаролот на Основниот суд Скопје 1, Седат Реџепагиќ. Во МВР, пак, и вчера тврдеа дека прекршочните пријави, кои обично завршуваат со парична казна, биле поднесени, но не знаат зошто не стигнале во Одделот за прекршоци.

Најавите за прекршочни пријави против 23 лица, кои учествуваа во тепачките на плоштадот „Македонија“, ги изрече министерката на полицијата, Гордана Јанкуловска, на прес-конференција што се одржа три дена по грубиот инцидент. Министерката изјави дека пријавените биле на возраст меѓу 20 и 52 години, но дека не знаела колку се од едната, а колку од другата група.

Најавите за прекршочни пријави уследија по големиот број критики што ги упатија јавноста, Канцеларијата на народниот правобранител и Хелсиншкиот комитет за човекови права поради млаката реакција на полицијата.

Јанкуловска тогаш соопшти дека нема да има казни за полицајците, кои според МВР, ги презеле сите законски мерки за обезбедување.

Сепак, по петнаесетина дена, сменет беше командирот на ПС „Центар“, со образложение дека „не покажал соодветни резултати“. Министерството не потврди ниту демантираше дали смената на првиот човек на станицата „Центар“ има врска со инцидентот на плоштадот, како и со спектакуларниот грабеж на Прокредит банка во центарот на Скопје, кога полицијата не успеа да ја спречи да побегне неколкучлената банда. (Г.А.)