Насловна

Македонците пред исчезнување во Бугарија

Бројот на Македонците во Бугарија може да се смести во научна фантастика, бидејќи не е нормален за две земји што ги дели земјена граница, а не океан

Слободанка Јовановска


„Размисли, можеш да зажалиш ако се запишеш Македонец!„

Вака, според сведоштвата на Македонците, се одвивал пописот во соседна европска Бугарија, чии резултати беа објавени деновиве и покажаа дека претставници на нашето малцинство има приближно колку и пријавените случаи на Марсовци на планетава - само 1.654. Како што пресметаа во Обединетата македонска дијаспора, со ваков културен геноцид ретко некој може да се пофали во светот - бројот на Македонците сега е трипати помал од тој по пописот во 2001 година, а дури стопати помал од пописот во 1956 година кога припадниците на нашето малцинство во Бугарија можеа слободно да се декларираат.

Тоа не им успеа ни за Израелците со сите бомбардирања на Палестинците шест децении, ниту, пак, на сите Арапи, и покрај толку војни со Израелците, а бројката може да се третира и како научнофантастична за население на соседна држава, која е одделена само со земјена граница, а не океан, па да нема воопшто етнички мешања.

Веројатно, на пописот во Македонија ќе има повеќе Кинези отколку што се покажа дека има Македонци во Бугарија, а на тој феномен деновиве гласно му се радувале таму бидејќи се блиску до денот (поточно до пописот), кој ќе покаже дека онака како што тврдат со децении, Македонци воопшто не постојат.

Како куриозитет во пописните податоци се регистрирани и 36.723 жители со странско државјанство, па по Русите и Украинците трети се тие од Република Македонија (1.091), но не се именуваат како Македонци. На весникот „24 часа“ и тоа му било многу па проценил дека не се ни толку туку само 800, што треба да сугерира дека тоа се некои ексцентрични фигури како оние што кај нас се уште се декларираат како Југословени.

Само во Бугарија патем може да се случи граѓанин кој се декларирал дека има турско потекло да напише во колумната за мајчин јазик бугарски, а Македонка што барала да се запише како таква да заврши со етничка припадност Ромка.

Овие податоци може да се прочитаат од пописните резултати и од сведоштвата на преставниците на нашето малцинство што собрале храброст да проговорат јавно, откако според оцената на ОМО „Илинден Пирин“, ОМО Илинден, ТМО-ВМРО, Организацијата на репресираните Македонци во Бугарија, Христијанското братство „Свети пророк Илија“ и шест други организации и медиуми беше официјализиран уште еден пописен фалсификат во Бугарија.

Според Стојко Стојков, што да се очекува друго од земја во која еден куп луѓе направиле кариера со антимакедонството и во која јасно беше пратена порака дека декларирањето како Македонец е антидржавно и казниво.

„Јасно е дека станува збор за фалсификат. Од сите македонски организации јасно кажавме дека, какви и да се резултатите, нема да ги признаеме. Ќе се собереме наскоро и ќе решиме какви чекори ќе преземете натаму“, најави Стојков информирајќи дека во моментов во процедура се уште три случаи во Стразбур против Бугарија.

Пресудно, според него, за да се обесхрабрат Македонците да се декларираат како такви биле заплашувањата не само врз нив туку и врз вршителите на пописот, откако пет вработени во Националниот статистички институт добија отказ бидејќи ја вклучија графата Македонец и македонски јазик на пробниот попис лани во септември.

Отстранувањето на графата психолошки гледано имала понегативен ефект отколку да ја немало, како на претходните пописи, бидејќи испратила политичка порака дека македонското самоопределување е непожелно и казниво. Притоа, според изјавите на Македонците, тие најчесто биле убедувани од попишувачите дека таква графа па и нација не постои, некои од нив користеле молив за да можат да ги избришат подоцна изјавите а кај тие што инсистирале да бидат впишани со пенкало - ја бришеле припадноста со коректор.

Македонка во Сандански која се заканила дека нема да даде други податоци ако не биде запишана како Македонка добила закана дека следниот ден ќе и дојдат со полиција и ќе плати 120 бугарски лева казна бидејќи одбива да биде попишана.

На сето тоа, според документот подготвен од македонските организации, му кумувале и медиумите во Бугарија, кои граѓаните што јавно се декларираат како Македонци ги „брендираат“ како национални предавници, непријатели на Бугарија, сепаратисти, па и терористи поддржани со странски пари, па омразата во однос на Македонците стана нормална појава, толку нормална што со леснотија ги опишуваат и со зборовите морони, мизерии и во стилот на Теодорос Пангалос некогаш - како „хомосексуалци“.