Забраната за пушење не важи за коцкарите

Александрија Стевковска


На тераса и во летни бавчи на угостителските објекти, односно ресторани, кафулиња, кафе-барови, отворени летни дискотеки и плажи во периодот од 1 март до 31 октомври ќе биде дозволено пушење. Ова го предвидува предлог- законот за измени и дополнување на Законот за заштита од пушењето, кој вчера на Собранието му го предложија пратениците на ВМРО-ДПМНЕ.

„Во делот каде што ќе биде дозволено пушењето, терасите и летните бавчи нема да смеат да имаат покриви ниту дополнителна опрема која на објектот ќе му дава затворен карактер“, изјави вчера претставникот на пратеничката група на владеачката партија, Влатко Ѓорчев, според кого, се очекува Законот да стапи во сила најдоцна за еден месец.

И додека се крчкаат законските измени во врска со Законот за заштита од пушењето, во најголем дел од казината низ земјава на големо се пуши. За дел од коцкарите не важи правилото како што е за сите останати затворени објекти, во кои согласно со Законот за заштита од пушењето, не смее да се пуши. Ниту една од инспекциите што вршат контроли за спроведувањето на овој Закон, Пазарна, Трудова, Просветна и Санитарна, не се наоѓаат повикани да направат надзор на казината. Овој „имунитетот“ на објектите каде што се играат игрите на среќа го потврдуваат и од Пазарната инспекција.

„Ние сме задолжени за контрола на угостителските објекти каде што се служи храна и пијалаци, а не и за затворениот дел на казината каде што луѓето се коцкаат, бидејќи во тој дел не се служи ниту храна ниту пијалаци“, велат од Пазарната инспекција.

Од она што екипата на „Утрински весник“ можеше да го забележи на терен за време на посетата во гевгелиските казана, сосема е јасно дека таму во дел од нив, во затворениот дел слободно се пуши и никој не смее да им забрани на луѓето што се коцкаат во исто време и да уживаат во цигарите. Со оглед на тоа дека инспекциите што го контролираат пушењето не смеат да се доближат до затворениот дел на казината, а инспекциите што ги посетуваат немаат надлежност да ги контролираат од тој аспект, коцкарите си функционираат според свои правила, кои подразбираат слободно пушење во затворена просторија.

Оправданието на луѓето од казината за слободното пушење во дел од нивните простории е дека во Законот за заштита од пушењето не е прецизирано дека во казината не смее да се пуши. „Делот каде што луѓето се коцкаат е издвоен од останатиот простор каде што се служи храна и пијалаци и за него не важат правилата за забрана на пушењето. Како и да е, ние преговараме со инспекциите тој дел од Законот да се прецизира и да ни кажат точно дали забраната за пушење важи и за нас или не. Како и да е, забраната за пушење не би требало да важи за казината, бидејќи никаде во светот во затворениот дел каде што има коцкање оваа забрана не важи“, велат во коцкарниците каде што во коцкарската купола се пуши.

Забраната за пушење предизвика војна и меѓу скопските казина, а сопствениците на казината што ја почитуваат забраната обвинуваат дека власта толерира пушење во одредени казина, со што нив ги става во нерамноправна положба. Тие обвинија дека поради забраната за пушење, која селективно се применува, тие губат дел од прометот и клиенти, кои се префрлаат во објектите каде што се пуши, со што им одземаат и дел од профитот. Казината што го почитуваат Законот потенцираат дека тие неколкупати пријавиле во Пазарна инспекција за кршење на Законот, но се' уште нема нивна реакција.

Ситуација на терен покажува дека и во некои угостителски објекти во Скопје, но и во Тетово, Гостивар, посетителите слободно палат цигара внатре во објектот. Од Пазарната инспекција велат дека не прават селекција во контролите, но и тие можат да функционираат колку што имаат инспектори на располагање.

Во знак на револт од воведувањето на целосната забрана за пушење, угостителските објекти во Македонија ќе ја реализираат најавата и утре ќе ги затворат своите објекти 24 часа, потврдуваат од Туристичко-угостителската комора. Тие веруваат дека протестот ќе биде масовен, а ќе започне со почетокот на работното време на угостителите. „Повикани се сите угостители солидарно да му пристапат на овој предупредувачки протест, со цел уште еднаш најконструктивно да апелираме до надлежните за сериозните последици од целосната забрана за пушење“, наведува Комората, според која, Законот веќе ги донесе првите загуби, отпуштања на вработени во секторот и најави за затворање локали.

Единственото барање на Комората останува дополнување на Законот со заедничко решение и право на избор и за непушачите и за пушачите.