Претходен број

Парно за ОУ „Лиман Каба“ во Љуботен

Основното училиште „Лиман Каба“ во село Љуботен од идната учебна година ќе има сопствено парно греење. Проектот го реализира Општина Бутел со финансиска помош од УСАИД - ПЕП. Комплетната финансиска конструкција чини околу 1,7 милиони денари. Работите ги изведуваше специјализираната фирма „Термотика“ од Скопје.

Од канцеларијата за информирање на Бутел велат дека со реализацијата на овој проект замина и последното ќумбе од училиштата во оваа општина. Сега единствена обврска на училиштето е за новата грејна сезона да ги бојоса училниците. За наесен надлежните од Бутел го најавуваат и свеченото предавање во употреба на топловодниот систем.

Во училиштето веќе е подготвена просторијата наменета за топлана и тоа според ПП-стандарди, инсталирани се и двата парни котла на течен енергенс и на електрична енергија, поставена е мрежната инсталација, како и радијатори во сите училници и во останатите простории. Специјалниот оџак, кој е битен дел за функционирање на системот, го обезбеди Општината. (Сн.К.)