Претходен број

Груевски со писмо бара од Караманлис да се реши македонското прашање

Македонскиот премиер со надеж дека во разумен период Караманлис ќе предложи решение за проблемите

Македонскиот премиер Никола Груевски му испрати лично писмо на грчкиот премиер Костас Караманлис во кое од својот грчки колега побара решавање на проблемот на македонското малцинство во Грција, решавање на прашањето на протераните Македонци од Грција за време на Граѓанската војна, што би вклучило враќање на нивните имоти, добивање државјанство и слободен влез во земјата. Македонскиот премиер во писмото изразува надеж дека во разумен период Караманлис ќе предложи решение за овие горливи проблеми. Груевски го бара тоа од Караманлис за "исправање многу историски неправди кои се чувствуваат и денес", а кои ќе ги подобрат и односите меѓу двете земји.

Груевски накратко во писмото на Караманлис му го опишува егзодусот на Македонците од Грција, како и нивнте судбини потоа. "За жал, децении потоа, по нивното напуштање на родните места и живеалишта, дури и откако заврши војната, ним им беше оневозможено, односно забрането да се вратат во своите родни места, во своите родни куќи и на своите имоти. Тоа не им беше дозволено ниту ним, ниту на нивните наследници", стои во писмото на Груевски, во кое се наведува дека тие луѓе се тројно дискриминирани - не можат да ги добијат имотите назад, имаат сериозни тешкотии за влегување во Грција и не им се дава двојно државјанство.

Груевски очекува од Караманлис, како премиер на држава-членка на ЕУ и НАТО, институции каде што особено се внимава на човековите права и на стандардите за гаранција на приватна сопственост, тој лично да преземе мерки за исправање на неправдата нанесена на огромен број луѓе. Тој наведува дека писмото го испраќа по барање на повеќе граѓански здруженија на Македонците протерани од Грција, да му се обрати како на премиер на соседна држава, од која тие се чувствуваат дискриминирани. Груевски, исто така, бара од Караманлис признавање на македонското малцинство во Грција и нивно образование на мајчин јазик (македонски), како и употреба на македонскиот јазик во локалните институции во местата во Грција каде што живеат тие во позначаен број. За оваа молба Груевски верува дека Караманлис со „задоволство ќе се ангажира да помогне“.

Македонскиот премиер му нуди на Караманлис и секаква потребна помош, и институционална и експертска, за решавање на прашањата. "Можно е и средба на експертски групи од двете држави кои, верувам, во еден краток неколкумесечен период ќе ги утврдат сите факти и детали, со кои ќе ги надминеме овие проблеми", наведува Груевски. Тој верува дека Грција ќе ја има потребната, пред се' политичка волја, за решавање на проблемите, сепак, додавајќи дека во денешно време, кога се работи за човековите и малцинските права, „не се работи за тоа дали сакаме или не сакаме да ги решиме, туку потребно е стриктно придржување до меѓународните стандарди“.

Писмото до Караманлис, покрај со надеж за добивање скорешен позитивен одговор, Груевски го завршува укажувајќи му на грчкиот премиер дека „јас и Вие не можеме да ја промениме историјата и минатото, но со добра волја можеме да исправиме многу неправди од минатото, а секако дека можеме да влијаеме во креирањето на подобра иднина“.

Портпаролот на грчката влада Теодорос Русопулос изјави дека македонскиот премиер одново ги повторува „познатите неприфатливи тврдења за непостојни малцинства и дека Грција на никаков начин не сака да учествува во каков и да е обид за дефокусирање на преговорите за името". Според него, грчкиот премиер ќе испрати одговор на писмото на Груевски до крајот на неделата. (Н.Р.)