СДСМ ја повикува Владата целосно да ја укине одредбата за оданочување на каматата што ја добиваат граѓаните на своите заштеди во банките. Со тоа, смета партијата, ќе се поттикне и ќе продолжи растот на штедењето на граѓаните како основа за поголеми инвестиции и отворање нови работни места.

„Во врска со вчерашниот Светски ден на штедењето, јавно ја повикуваме Владата да го примени решението од страница 21 од програмата на СДСМ. Истовремено, ја поздравуваме подготвеноста на министерот за финансии, Зоран Ставрески, да им понуди вработување во Министерството за финансии на десет најдобри студенти од Економскиот факултет во Скопје“, изјави вчера на прес-конференција потпретседателот на СДСМ, Зоран Јовановски.

Според него, Владата ги применува решенијата содржани во програмата на СДСМ. „На страница 97 од програмата ’Решенија за Македонија‘, во делот ’Перспективи за младите‘, предвидовме континуирано вработување на најдобрите студенти во јавната администрација, како битна претпоставка за подобрување на нејзините капацитети.

Ги охрабруваме министерот Ставрески и Владата да продолжат да ги реализираат и другите решенија од програмата на СДСМ за доброто на сите граѓани на Македонија“, истакна Јовановски.

По прес-конференцијата на СДСМ, веднаш се огласи со реакција и владејачката ВМРО-ДПМНЕ. Според нив, мерката што ја бара СДСМ за укинување на одредбата за оданочување на каматата што ја добиваат граѓаните на своите заштеди во банките одамна е донесена, но никогаш не се спроведувала, ниту минатата година ниту, пак, оваа година.

„Зачудувачки е тоа што Зоран Јовановски, иако претставен како економски експерт на СДСМ, не е информиран дека со измените на Законот за персонален данок, оданочувањето на банкарските депозити е одложено до крајот на 2010 година. Зачудува тоа што СДСМ, всушност, не знае дека со мерката што ја предлага, нема ништо суштински да се промени“, реагираше вчера ВМРО-ДПМНЕ.

Во однос на проектот за континуирано вработување на најдобрите студенти во јавната администрација, од ВМРО-ДПМНЕ посочија дека ги спроведуваат мерките што се од полза за сите граѓани на Македонија.

„Дали Зоран Јовановски се' уште мисли дека неговата заложба за девалвација беше и се' уште е добра идеја и дали знае колку македонски граѓани настрадаа со оваа негова идеја, претворајќи ги денарите во девизи“, прашаа од ВМРО-ДПМНЕ. (Ек.Р.)