Започнува распитот за смртта на Мартин Нешкоски
Лекарскиот тим што го подигнал безживотното тело на Мартин Нешкоски од тревникот пред управната зграда на „Мепсо“ денеска треба да се појави пред истражен судија. Од екипата на Итна помош судот ќе треба да ги добие основните информации што се однесуваат на констатираната смрт на Нешкоски, но, несомнено, многу поважно ќе биде да се обезбеди информација околу нивното повикување за интервенција.
Дали екипата од Итна помош ќе се појави пред истражниот судија, засега е неизвесно бидејќи нема потврда дека има уредна достава на судските покани.
За истражната постапка од поголемо значење е дали на распит ќе бидат повикани и полицајците што му помогнале на осомничениот Игор Спасов за да го пренесе телото на починатото момче на тр��вникот пред „Мепсо“. Мартин Нешковски беше брутално претепан до смрт од Игор Спасов, припадник на полициските „тигри“ на 6 јуни, само 40-ина минути по полноќ за време на прославата на изборната победа на владејачката ВМРО-ДПМНЕ.
Полицијата два дена не проговори за оваа бруталност на специјалецот од МВР, што создаде огромен револт во јавноста и серија протести на младите во земјава. Тие, освен за Спасов, побараа кривична одговорност и за уште неколкумина припадници на полицијата што биле сведоци на немилиот настан. (Љ.С.) |
