Само двојка за државната матура

Поразителни резултати од полагањето на испитите во средните училишта

Оливера Војновска

Матурантите покажале поразителни резултати на екстерните тестови од државната матура. Според официјалните податоци за просечниот успех, речиси половината, односно 39 од вкупно 92 средни училишта, добиле просечна оценка поголема од двојка (од 2 до 3), а само три училишта имаат просечен успех над 4.

Рејтинг-листата покажува дека шест училишта имаат успех над единица (од 1 до 2), а 44 повисок од тројка (од 3 до 4). Просечната оценка на целото тестирање во јунскиот рок, кога полагаа вкупно 16.734 матуранти, е 2,99. Од ваквите резултати е разочаран и министерот за образование, Никола Тодоров, кој вчера ги презентираше на прес-конференција во ресорното Министерство.

„Лошите оценки се резултат на лошо изработените тестови кои, пак, се должат на лошо акумулираното знаење“, коментираше Тодоров. Свесен за слабите резултати од матурата, тој најави детална анализа на целиот образовен процес, со цел да се регистрираат слабостите и да се надминат. „И од ова тестирање се увиде дека оценувањето што го вршат наставниците не е реално. Знаењето што го оценуваат со високи оценки не е реално стекнато. Треба да се бориме да се оценува реалното знаење, само така ќе успееме да го подигнеме квалитет“, смета Тодоров.

Членот на собраниската Комисија за образование и наука, пратеничката од СДСМ, Славица Грковска-Лошкова, исто така, е разочарана од резултатите на државната матура. „Мора да се направи сериозна анализа за причините за ваквите резултати. Уште еднаш се покажа дека во образованието треба да се влечат вистински, а не популистички потези, како параван дека Владата нешто прави, а всушност ефектите ги нема никаде“, смета Грковска-Лошкова.

Највисока просечна оценка (4,12) на државната матура во јуни добиле матурантите од СУГСГ „Раде Јовчевски-Корчагин“. За оваа скопска гимназија министерот Тодоров рече дека „е најуспешното училиште, училиште кое обезбедува најквалитетно образование во Македонија“.

На екстерните тестови од државната матура просечна оценка над 4 добиле уште две средни училишта - „Орце Николов“ - Скопје (4,02) и Државното музичко училиште - Битола (4,00). Најниска просечна оценка (1,49) е забележана во тетовското СУ „Гоце Стојчески“. Покрај „Гоце Стојчески“, просечна оценка од 1 до 2 имаат уште пет училишта: „8 Септември“ - Скопје (1,50), „Моша Пијаде“ - Тетово (1,60), „Кузман Шапкарев“ - Битола (1,60), „Боро Петрушевски“ - Скопје (1,91) и „Никола Карев“ - Струмица (1,98).

Тодоровски не го криеше незадоволството од добиените резултати на тестирањето на матурантите. „Овие бројки не треба да претставуваат само статистика, туку треба да ни покажат што треба да правиме и каде да се движиме, зашто не смееме во никој случај да дозволиме бројот на најслаби училишта да биде многу поголем од бројот на успешни училишта. Овој резултат не' обврзува во наредниот период да преземеме многу активни мерки за подобрување на образовниот процес во Македонија“, рече министерот.

Сепак, тој не прецизира кои се тие мерки, само најави дека еден од приоритетите ќе биде донесувањето закон и национална рамка за професионални квалификации. „Размислуваме за повеќе модели како да го реформираме средното образование и идната година ќе се посветиме исклучиво на тоа“, додаде Тодоров.

Министерот и на вчерашната прес-конференција го повтори ставот дека нема да се отвораат нови паралелки во Средното медицинско училиште „Панче Караѓозов“. „Во ’Панче Караѓозов‘ има десет паралелки на македонски и пет на албански јазик. Бројот на паралелките нема да се зголемува. Мислам дека проблемот со ’Панче Караѓозов’ што се повторува секоја година е токму во проширувањето на паралелките. Бараме начин како тие што сакаат да учат медицина да учат медицина, а не тие што сакаат да учат медицина да мора да учат во ’Панче Караѓозов‘. Тоа им го кажав и на родителите“, дециден е Тодоров.

Тој и вчера повтори дека до 1 септември комплетно ќе биде реализиран проектот за бесплатни учебници, што почна завчера во Прилеп, а ќе се реализира во три фази. „Во првата се опфатени најголемиот број учебници, во втората се учебниците за четврто и седмо одделение и третата се средните стручни училишта“, рече Тодоров.