Папата поканет да ја посети Македонија

Односите меѓу Ватикан и Македонија се одлични

Ватикан - Шефот на македонската дипломатија, Антонио Милошоски, вчера во Ватикан му ја предаде поканата на секретарот за односи со државите на Светиот стол надбискупот Доминик Мамберти од претседателот Ѓорге Иванов за посета на папата Бенедикт XVI на Македонија.

Во писмото, Иванов потсетува дека штотуку се навршени 2.000 години од раѓањето на апостол Павле, а следната година се прават подготовки за прослава на стогодишнината од раѓањето на Мајка Тереза.

„Затоа сакам да испратам до Вашата светост искрена покана да не' посетите во Македонија по тој повод на датум кој Вие ќе сметаме дека е слободен за Вас. Не само јас како претседател на државата, исто така, и Владата, како и католичкото население и православното и сите членови од националната заедница ќе бидеме навистина почестени и среќни да Ве примиме во нашата земја“, вели Иванов во писмото.

Милошоски по средбата изјави дека односите меѓу Ватикан и Македонија се одлични и пријателски и ги краси една заемна доверба и почитување.

„Благодарни сме што Ватикан, во сите овие изминати години откако Македонија е независна држава, ги честита сите позначајни празници и на македонскиот јазик, што е од големо значење“, рече Милошоски. (МИА)