Претходен број

Пациент починал по вадење камен во мочен канал

Пациент умрел по банално вадење камен од мочниот канал. Пациентот Благоја Мазнев, инаку сопруг на пратеничката на ВМРО-ДПМНЕ, Косана Мазнева, постои сомневање дека умрел под неразјаснети околности. Поради ова, Клиниката за урологија повела постапка да се испита случајот и да се утврди причината за неговата смрт откако од Градската болница бил префрлен на КАРИЛ, а уролозите го лекувале од тешки компликации. Дополнително ќе се чекаат и наодите од обдукцијата.

За бизарниот случај лекарите ни на Клиниката за урологија ни во Градска болница не сакаат јавно да зборуваат. А во болничките кругови се говори дека во овој случај не е исклучено дека е во прашање лекарски пропуст.

Приказната почнала пред околу еден и пол месец, кога 38-годишниот Благоја бил примен во Градската болница, каде што било утврдено дека има заглавено каменче во мочниот канал, помало од зрно ориз. Вадењето на каменчето било направено без операција, по пат на уретроноскопија. Според болнички извори, направената интервенција не дала резултати и пациентот бил повторно опериран, но на класичен начин со отворање на стомакот. Но, по оваа операција, коментираат лекарски извори, на болниот нагло му се влошила состојбата и итно бил префрлен на Клиниката за урологија. Таму му биле направиле три операции. Но, иако го оперирале врвни уролози, не успеале да го спасат. Пациентот починал на КАРИЛ, откако два дена пред тоа паднал во кома.

Во Министерството за здравство велат дека ако случајот биде пријавен, ќе се формира стручна комисија за да испита што е превземено и дали пациентот бил соодветно згрижен. (Ј.Ј.)