Претходен број

На Технолошкиот факултет во Велес се пријавил само еден кандидат

Незаинтересираност и за новите државни факултети на универзитетот „Гоце Делчев“ во Штип

Жаклина Хаџи-Зафирова

Само еден кандидат се пријавил на новиот државен Технолошко-технички факултет во Велес кој од оваа година го отвори битолскиот универзитет „Св. Климент Охридски“, додека ниту еден не поднел документи на новоотворените дисперзирани студии на овој факултет во Кичево.

Разочарувачки е и интересот на новите државни факултети на штипскиот универзитет „Гоце Делчев“, за кои Владата даде виза да се отворат сакајќи да го доближи образованието до студентите во руралните средини. За новиот Технолошко-технички факултет што требаше да почне со работа во Пробиштип се пријавиле само двајца кандидати, додека тројца аплицирале за Електротехничкиот факултет во Радовиш. За Машинскиот факултет, пак, кој треба да се отвори во Виница се пријавиле само шест кандидати. За сите три факултети имаше отворено по 100 слободни места.

Вака изгледа интересот за запишување на средношколците во дел од помалите места, а во кои Владата планира да отвори високообразовни институции за да ги намали трошоците на идните студенти кои досега патуваа до Скопје и поголемите градови за да се школуваат. Државните универзитети потврдија дека допрва ќе се пресметаат дали вреди новите факултети воопшто да се отворат и да постојат само за неколку студенти.

Но, не е поразителна само сликата во помалите места, бидејќи по првиот уписен рок на факултетите, разочарани се и на Технолошко-металуршкиот факултет во Скопје. Иако, од друга страна, на првиот уписен рок стандарден беше огромниот интерес за упис на факултетите од општествените науки.

Покрај слабиот интерес за Технолошко-техничкиот факултет, кој треба да се отвори во Велес, недоволен интерес има и за Правниот факултет во Кичево, кој исто така треба да почне со работа годинава, во рамките на Битолскиот универзитет. За вкупно 310 места аплицирале 114 кандидати.

Овие разочарувачки бројки за новите факултети, на Битолскиот универзитет го објаснуваат со фактот дека конкурсот за двата нови факултета излегол во саботата, така што немало доволно време кандидатите да се информираат. Наедно, додаваат дека резултатите се прелиминарни и се надеваат дека интересот ќе се зголеми во вториот и во третиот уписен рок во септември и во октомври. До 13 часот вчера на сите факултети на Битолскиот универзитет се пријавиле 2.365 кандидати за околу 4.000 места.

Слична е состојбата и со новите факултети на Штипскиот универзитет, каде што исто така немаше доволно кандидати за да се пополнат слободните места. Вчера до 11 часот на новиот Факултет за туризам и бизнис- логистика, кој треба да биде лоциран во Гевгелија, се пријавиле 37 кандидати за 140 места. На новиот Филолошки факултет во Штип се отворени 310 места, но се пријавиле само 142 кандидати. Не се пополнети ни местата на Факултетот за медицински науки во Штип, каде што аплицирале 54 кандидати за 90 места. „По вториот уписен рок ќе се разгледува вкупниот број на кандидати кои се пријавиле на новите факултети, а потоа ќе се одлучи дали има основа за отворање на овие нови високообразовни институции“, велат на универзитетот.

Но, ваквите бројки изгледаат поинаку во очите на министерот за образование и наука, Перо Стојановски, кој го посети Штипскиот универзитет првиот ден од уписите и изрази задоволство од бројот на пријавените кандидати.

Слаб интерес имаше и на Технолошко-металуршки факултет во Скопје каде што до вчера се пријавиле 58 кандидати, а од кои само 11 за отсекот металургија. Деканот на овој факултет, Александар Димитров, е разочаран што опаѓа интересот за технолошки инженери. Затоа порачува дека Владата мора да најде начин како поинаку ќе ги стимулира идните студенти за овие науки.

Приватните универзитети годинава се задоволни од одѕивот кај кандидатите, така што тие се пофалија дека уште малку им фали за да ги пополнат местата уште во првиот уписен рок.