Чешка бара да продолжи проширувањето на ЕУ
ЕУ не треба да подига вештачки бариери со нови услови, рече чешкиот премиер и актуелен претседавач со ЕУ
Европската унија треба да продолжи со прием на нови членки без дополнителни условувања и да не се фати во замката на изолационизам поради актуелната глобална економска криза, порача чешкиот премиер и актуелен претседавач со ЕУ, Мирек Тополанек, на отворањето на меѓународната конференција „Проширувањето на ЕУ пет години подоцна“, која се одржува во Прага. Според Тополанек Унијата треба да продолжи со процесот на проширување без да подига вештачки бариери со поставување некакви нови услови пред земјите кои сакаат да станат членки.
Конференцијата на која учествуваат околу 50 високи европретставници е со цел да се предочи користа, пред се' економската, од влезот на посткомунистичките земји во 2004 и во 2007, но треба да укаже дека иста корист ќе донесат и новите проширувања. „Ние пред 40 години живеевме во комунистичка зоолошка градина, но не престанавме да бидеме Европејци. Животот во кафезот не направи од нас тоталитарни животинчиња“, рече Тополанек, додавајќи дека затоа нема апсолутно каква и да е причина ЕУ сега да одбива некои земји кои чуваат на нејзината врата „само затоа што и' се чини дека се сиромашни или премногу историски или културно различни“. „Никако не смее да се прават нови бариери во вид на некакви дополнителни услови. Критериумите од Копенхаген не се лични, тие се строг, но правичен тест колку сериозно земјите-аспиранти мислат да се интегрираат во ЕУ и колку се подготвени за тоа“, нагласи чешкиот премиер.
На конференцијата учествува и македонскиот вицепремиер здолжен за европски прашања, Ивица Боцевски, кој во своето обраќање во Прага рече дека „проширувањето е најпозитивната политика на ЕУ, но на Македонија и на сите други земји од Западен Балкан во моментов им е потребна јасност и предвидливост на целиот ��роцес, како и негово врамување во прецизна временска рамка исто како што беше направено со државите кои влегоа во ЕУ во 2004 и во 2007 година“.
„Сметам дека времето е зрело за еден сеопфатен, голем план што ќе ја предвиди не само следната фаза туку целокупниот процес до крајната интеграција на секоја земја од Западен Балкан, процес со јасни планови и временски рамки за секоја држава“, изјави Боцевски. Според него, учесниците на конференцијата уште еднаш потврдиле дека проширувањето е најуспешната политика на Унијата. (Н.Р.) |
