ОН ја испрашуваа Грција за македонското малцинство
Македонците во Грција ја оценија како историска посетата на експертот за малцински прашања на ОН
Грчките медиуми посетата на Геј Мекдугал ја оценија како отворање нов проблем за грчката дипломатија - и тоа малцинскиот
За Грција станува се' подалечно времето кога успешно го прикриваше постоењето на малцинства на своја територија и се декларираше себеси како етнички чиста држава. Најновиот удар за грчката ксенофобија е посетата на експертот за малцински прашања на ОН, Геј Мекдугал, која вчера го заврши своето неколкудневно „чешлање“ на Грција од север до југ за евидентирање на постоење или не на малцинства на грчка територија. Мекдугал, која покрај Грција треба да провери уште две држави, Унгарија и Етиопија, за шест месеци ќе го објави својот извештај за малцинските прашања во овие три земји.
За време на посетата на Воден, Мекдугал се сретнала со претставниците на македонското малцинство од речиси цела северна Грција, како и со претставниците на партијата на македонците во Грција - Виножито, кои нејзината посета ја оценија како историска.
На независниот експерт на ОН тие и' го презентирале децениското негирање на постоењето на македонското малцинство во Грција, презентирајќи и' и докази во вид на документи, фотографии за официјално произнесување како Македонци, забрана за образование на мајчин јазик, полициски тортури и слично, се' со цел да се искорени свеста за самобитност и припадност кон друга – негрчка нација. Мекдугал била запознаена со непочитувањето на Универзална декларација на ОН за заштита на човековите права и слободи, Европската конвенција за човекови права, Рамковната конвенција за заштита на националните малцинства на Советот на Европа, пресудите за Судот за човекови права во Стразбур, од страна на Грција, во поглед на македонското малцинство кое живее таму, но и спрема сите други, бидејќи Грција на својата територија не признава постоење на друго етничко малцинство, освен муслиманското - како верско малцинство.
„Во март идната година се надевам дека ќе биде премногу интересен извештајот за состојбата во Грција и непочитувањето, не само на македонското малцинство туку и со другите што имаат проблеми – од турското, па до ромското, што се дискриминирани во оваа држава“, изјави претседателот на Виножито, Павле Васкопулос, за македонските медиуми.
Ва��копулос се надева дека посетата на Мекдугал и нејзиниот извештај за состојбата со малцинствата во Грција дека „ќе помогнат Грција да се демократизира и да не биде црна дупка не само во Европа туку и пошироко, кога зборуваме за почитување на основните човекови права и правата на малцинствата“.
Грчките медиуми посетата на Мекдугал ја оценија како отворање нов проблем за грчката дипломатија - и тоа малцинскиот. Некои од нив посетата ја поврзуваат со неодамнешните писма на македонскиот премиер, Никола Груевски, за прашањето на македонското малцинство во Грција, до генералниот секретар на ОН, Бан Ки Мун, и други светски лидери. „Елефтерос типос“ објави дека посетата е поради тврдењата на Скопје за притисоци што се вршат врз Македонците.
„Грција, Унгарија и Етиопија се единствените три држави што се на листата за посети на Мекдугал, по што ќе поднесе извештај за проблемите и за кршењето на малцинските права“, пишува весникот. Весникот под наслов „Малцински игри“, наведува дека официјална Атина не ја коментира посетата, но, според дипломати, грчката дипломатија се здобила со уште еден проблем што досега го немала - малцинскиот. (Т.Г.) |
