Сугестии до Бакојани за директни преговори со Македонија
Атина – Експерти од грчкото Министерството за надворешни работи и' сугерираат на шефицата на дипломатијата, Дора Бакојани, да почне директни преговори со Македонија за името. Ова го пишува грчкиот весник „Експрес“, наведувајќи дека Бакојани добива предлози да разгледа разговорите со властите во Скопје да продолжат без посредство на Обединетите нации, под чиј мандат тие се водат изминатите 15 години.
Според весникот, како што пренесува Макфакс, предлозите за директни преговори се поставени во поширок контекст на размислување како Атина би можела да ги промени позициите за да постигне крајно решение на прашањето за разликите за името.
Но, во македонското МНР велат дека одбиваат да ги коментираат нагаѓањата во грчкиот печат. ОН се вистинското место и рамка каде се водат разговорите за разликата околу името, а досега ниедна од двете страни, ни Грција ни Република Македонија не покренале иницијатива за менување на веќе воспоставениот формат на разговори, велат во МНР. (Н.Р.) |
