Претходен број

Полицијата удри по млекарите

Многу вербални конфликти меѓу полицијата и сточарите. Полицајците ги казнуваа нерегистрираните трактори со 500 евра

БИТОЛА - Протестот на пелагониските фармери најавен уште пред една недела за вчера, на влезот на Битола, го спречи полицијата. Судирот фармери–полицајци беше неизбежен.

Тренирајќи строгост, полицијата насилно ги истурка незадоволните сточари од магистралниот пак Битола - Прилеп, влечејќи ги за раце и туркајќи ги по грбот за да не дозволи да го блокираат сообраќајот.

Припадниците на МВР постојано им се закануваа на фармерите дека ако ја блокираат клучката Крклино и двата патни правци кои водат за Скопје, ќе ги приведат и кривично ќе одговараат за попречување сообраќај на магистрален пат. Атмосферата со часови беше тензична, со многу вербални конфликти меѓу полицијата и сточарите.

Стотина фармери кои вчера едвај успееја да се соберат на протестот зашто пеш доаѓаа на блокадите, ги пречека двојно повеќе полиција. Напомош беа повикани и прилепски полицајци кои чекаа во комби-возило. А, како поддршка на фармерите од Битолско дојдоа само неколку автомобили со сточари од Скопско и Штип.

И покрај присуството на телевизиските камери, полицијата не се стеснуваше да ги притисне фармерите за да се откажат од намерата да ја искажат својата граѓанска непослушност за неисплатеното млеко од „Сведмилк“. Но, уште повеќе за уништување на над 7.000 сточарски семејства во Македонија кои единствено егзистираат од млекопроизводство.

„И самите бевте сведоци на притисоците што ги тренира полицијата врз фармерите. Кажете дали им дадовте отпор на нивниот терор. Ова е срамен притисок за една демократска држава. Ние сме под тортура на полицијата, а само ги бараме нашите мачно сработени пари. Постојано сме под притисоци, де од полицијата, де од даночниците. Не' пцујат и не' туркаат. Од пред неколку дека полицијата кружи по селата и не' убедува да не протестираме. А, бре, луѓе, ние само си ги бараме нашите пари“, револтиран изјави Душко Илевски, фармер од Битола, водач на протестите со закана дека протести ќе има се' додека владини претставници не дојдат во Битола и не им ветат исплата на парите.

По неуспешниот обид да го блокираат влезот на Битола, сточарите пеш се упатија кон градот и повторно се лоцираа пред вратите на битолскиот градоначалник Владимир Талески. Но овој пат подготвена таму ги пречека бројна полиција. Тие побараа да се сретнат со градоначалникот, но тој не ги прими, а полицијата ги избрка. Потоа отидоа и кај подрачниот министер за земјоделство, но и таму не им дозволија средба. Од протести не се откажуваат.

Контроли на сообраќајната полиција вчера од рано утрото беа поставени на влезовите од речиси сите пелагониски и потпелистерски села каде што има фармери-кооперанти на шведската млекарница. Сточарите не можеа да ги поминат полициските патроли поставени на речиси секоја раскрсница. Сообраќајците им бараа сообраќајни дозволи од регистрирани трактори. А потоа им пишуваа казни од 400 до 500 евра. Ако негодуваа фармерите, полицијата им се закануваше со казни за непочитување на овластено лице и од фармерите бараше да им се обраќаат со „господине сообраќаец“. Сточарите со нерегистрирани трактори беа принудени возилата да ги остават по тротоарите за да не го попречуваат сообраќајот.

„Ова е прв пат во последните дваесет години да ни бараат регистрирани трактори. Зошто некни кога на сточниот пазар ги продававме кравите не ни бараа дозволи, туку ни го расчистуваа патот. Сега кога решивме да протестираме, бараат дали сме регистрирале трактори. Ова во турско го немаше. Да те украдат, да ти ги земат парите и да ти наредуваат што да правиш. Ова го нема никаде. Полицијата со камери не' снима и пишува казни“, во очај зборува Зоранчо Кулевски, фармер од Долно Оризари, додека полицијата инсистираше да го легитимира.

И покрај притисоците, фармерите беа единствени и категорични дека на протестите остануваат за да ја искажат својата граѓанска непослушност. Огорчени што и по девет месеци не им е исплатено млекото, а Владата не презема мерки за расчистување на овој финансиски скандал, фармерите побараа од министерката за внатрешни работи, Гордана Јанкуловска, да ги открие виновниците.

„Ујдурмата со ’Сведмилк‘ продолжува. Сега млекото ни го откупуваат камиони од ’Сведмилк‘, а тоа оди во прилепската млекарница. Кој сега полни џебови со нашето млеко? Каде е министерката Јанкуловска да ги открие виновниците за оваа афера. Кој ги украде парите нека каже, кој го направи овој криминал, а не да пушта полиција да не' тепа. Во оваа државата нема ниту судство ниту полиција. Ќе легнеме на земја, нека не' газат, но не се откажуваме од парите и вистината“, повика Илиевски.

Инаку, фармерите се сомневаат дека вчерашните протести организирани во Скопје за поддршка на веронауката се инструирани од власта, со намера да се фрли во сенка протестот на млекопроизводителите.

„За оние што протестираа во Скопје за веронауката полиција нема, а за нас има. Оти ние сме говедари, а тие се мирен народ. И самите гледате што се случува. На нашите деца не им треба веронаука, туку леб. Со што да ги пуштиме да учат кога немаме пари за да им го платиме школувањето. Не ни требаат ниту оџи ниту попови, за леб страдаме. Ова е глупост на Владата“, рече Илевски.

Фармерите велат дека оставени без пари им пропаднала и пролетната сеидба што дополнително ја влошува нивната живејачка.

„Триесет и три години сум фармер. Имам произведено три милиони литри млеко. Ама полоша година од оваа немам дочекано во мојот живот. Дедо ми и татко ми се занимаваа со овој бизнис, но не се случило за леб да страдаме. Не' дотераа и леб да не си купиме. Лани ова време сеидбата на пченката беше готова. Сега нема сеидба, а нема ни крави. Ако сака овој народ нека јаде брашно матено со вода, а ние кравите ќе ги продадеме и ќе куртулиме“, вознемирен се пожали ЗлаткоТодоровски, фармер од Долно Оризари.

Битолските сточари вчера реагираа дека биле исклучени и од Управниот одбор на Федерацијата на фармери. „Комисијата, која избира делегати за УО, за жал, не избра ниту еден делегат за секторот говедарство. Сега и Федерацијата на фармери им го заврти грбот на пелагониските сточари“, потенцира Драги Нечовски, досегашен претставник во УО на Федерацијата на фармери.

За вчерашниот однос на полицијата спрема фармерите од битолскиот сектор за внатрешни работи категорични тврдат дека се постапувало според законите. „Само ги замоливме фармерите да се тргнат од магистралниот пат. Постапивме според законите за јавни собири и безбедност во сообраќајот каде што точно е наведено каде може да се протестира. Но, и тоа дека казниво дело е да се блокира магистрален пат“, изјави Ѓоко Стрезовски, портпарол на СВР-Битола.