Претходен број

Македонците во Овчарани му одговорија на Караманлис

Игроорците на „Танец“ претресувани од грчките цариници како да се шверцери

Од нашиот известувач
Димитар Чулев

ОВЧАРАНИ - На Караманлис му се случи „народ“ во Овчарани, Леринско, само 24 часа откако се избламира со тврдењето дека во Грција „не постои и никогаш не постоело македонско малцинство“. Близу три илјади луѓе, кои играа, пееја и говореа на македонски јазик, викендот дојдоа на централната манифестација на празникот Свети Илија во Овчарани, а манифестацијата овој пат го привлече вниманието и на грчките медиуми.

„Славопровокација на скопјаните во Лерин“, објави на насловната страница вчера гласилото од Лерин „Прото тема“, а грчките електронски медиуми, меѓу кои предничи ТВ Антена, во континуитет објавуваат прилози од Овчарани, Солун, Скопје, Меџитлија, во кои комбинирано известуваат за „скопскиот упад“ во панаѓурот во Овчарани. Во живо вчера се емитуваше пренос од обидот на македонскиот национален ансамбл „Танец“ да влезе во Грција по петчасовните договарања со грчките погранични власти, кои на професионалните фолклористи од Македонија им кажаа дека не им гарантираат безбедност доколку ја минат границата. Група педесетина активисти на ултранационалистичката „Златна зора“ демонстрираа вчера на грчкиот дел од границата со петметарско грчко знаме во обид да го блокираат влезот на КУД „Танец“.

„Жешкиот пречек“ беше избегнат по телефонските разговори на релација Скопје – Лерин – Атина - Овчарани по кои на игроорците од КУД „Танец“ им беше дозволено да влезат на грчка територија по деталниот претрес на границата како да се шверцери.

„Ги предупредивме грчките власти дека протестот на ултранационалисти на границата и спречување официјално најавен настап на културно-уметничко друштво од соседната држава ќе говори лошо за грчкиот имиџ во Европа“, изјави вчера за „Утрински весник“ претставник на Културно-уметничкото друштво од Овчарани, на чија покана „Танец“ втора година доаѓа во ова село. По ова, ултранационалистичката група се повлече од границата, но затоа изведе едночасовна парада низ Лерин, на која беа исфрлени стотици килограми пропаганден материјал во вид на летоци. „Нема никаков компромис за Македонија“, „Да не се преговара со циганоскопјаните“, „Македонија е грчка земја“, „За Македонија единствено решение е граница на Грција со Србија“, беа некои од пораките на кои не се ни обѕрнаа леринчани. Вчера недостигаше само летокот кој во саботата вечерта пред почетокот на манифестацијата во Овчарани повикуваше Грција - да ја побара Битола (Монастири), бидејќи тоа било грчка земја. Но, затоа митрополитот солунски Антимон за ТВ Антена побара да се признаело грчкото малцинство во Битола.

Ѓорѓи Пултовски, некогашен кмет на Долна Грешница, општина на десетина минути возење од македонско-грчката граница, која обединува 16 села со над 4.500 жители, вели дека Караманлис уште в понеделник треба да им даде отказ на советниците што му го напишаа писмото-одговор до Груевски. „Опулите се (погледнете) зад мене, овие млади луѓе се тие за кои Караманлис вели дека не постојат. Во заднина се македонските ора, кои немаат никаква врска ни со грчката ’самјотиса‘, грчкото ’зембетико‘, а уште помалку со сиртакито, само млади луѓе. Весели женски лица го заменија ликот на традиционалната Егејка, која до 30-та година веќе беше вдовица обвиена во црно“, ни изјави тој.


Ултранационалистичката група „Златна зора“ изведе едночасовна парада низ Лерин, на која беа исфрлени стотици килограми пропаганден материјал во вид на летоци

„Младите се преплашија“, ни вели Николас Терезиос, или Никола Терзиоски, од Градобор, етнички чисто македонско село со три илјади жители на само 15 километри од Солун. Доаѓа во Овчарани од раните деведесетти кога првпат „ја скрши македонцката песна“.

Да објасниме, на прославата во Овчарани два часа трае официјалниот дел во кој е дозволена само „свирка“, но не и пеење. Пред полноќ, во сабота, како и во изминатите 19 години, почнува неофицијалната прослава на која од „Македонско девојче“, преку „И ние сме деца на Македонија“ до „Каде сте Македончиња“ се пеат изворните песни од трите дела на Македонија. Доаѓаат луѓе во Овчарани од цела Егејска Македонија. Предничат оние од Крушоради, село на четири километри од Овчарани, каде што има споменик на кој е името на Никос Грујос, дедо на актуелниот македонски премиер Никола Груевски. „Никола Груев, постариот, во годините пред Втората светска војна, патот го одвел од родното Сетина во Крушоради“, ни вели Петрос Андониу, еден од малкутемина останати Македонци во селото. „Бевме 1.200 Македонци. Илјада избегаа, куќите и имотите ги дадоа на дојденци од 20 различни места, почнувајќи од Атина, преку Мала Азија до грчки повратници од Русија“.

Многу историско време има во навидум забавниот панаѓур во Овчарани. Атина Цингули и нејзината пријателка Ирини Анастесјаду доаѓаат не само да одиграат оро. Тие велат дека тоа што го учат во Овчарани го пренесуваат натаму. Сопругот на Атина, Атанас(иос), додава дека сега на негова 40-годишна возраст единствена цел му е да го пренесе јазикот што го научил од дедовците и татковците на 12-годишниот син Фоти и на седумгодишниот Константинос. „Сега само го разберват, ама ќе го научат“, вели мајката Атина...

Македонските песни и ора продолжија доцна во ноќта...