Претходен број

Новата зграда во Скопје само ќе личи на Народната банка

Деловниот објект со приземје и шест ката се гради на едно од најскапите места во Македонија

Сања Наумовска

Новата деловна зграда што се гради во срцето на Скопје, на аголот на кејот „13 Ноември“ и плоштадот „Македонија“, само ќе заличува на некогашната Народна банка која постоела на просторот меѓу некогашниот „Метропол“ и реката Вардар до земјотресот во 1963 година, но нема да биде нејзина копија. Новата зграда има изменета маркичка со поголем габарит и различна форма од онаа на банката.

Според проектот, фасадите кои ќе гледаат кон Вардар и кон плоштадот „Македонија“ ќе задржат многу елементи со кои ќе потсетуваат на изгледот на поранешната банка. Се задржуваат столбовите и полукругот и некои други детали со кои главната фасада ќе ја задржи мемориската нишка на Народната банка, како одредница на тој простор.

Според авторот на проектот, архитектот Јовица Стефановски, од студиото за архитектура „Јасива“, во проектот нема аспирации за целосна реплика на Народната банка, бидејќи и самата маркичка не го дозволува тоа. Новиот објект е во габарит што го дозволува новиот Детален урбанистички план и одобрението за градба, но со вметнување детали кои ќе потсетуваат на некогашната банка.

„Ова ќе биде современ објект чија ултрамодерност во надворешниот изглед ја занемаруваме заради почитување на таа мемориска нишка на Народната банка. Ќе бидат искористени најубавите делови на предните фасади кои се свртени кон реката и кон плоштадот“, вели Стефановски.

Новиот деловен објект ќе има приземје и шест ката со две галерии на врвот, во кои ќе има и ресторан. На приземјето, дел од деловните простории веројатно ќе ги закупи една од домашните банки, а дел голема компанија. Шесте ката ќе бидат опремени како административен простор кој ќе се приспособува на потребите на потенцијалните клиенти кои ќе изразат заинтересираност во текот на изградбата на објектот.

Инвеститори на административно-деловниот објект се фирмите „Латис“ и „Дивелоп“, кои пред половина година добиле одобрение за градење од Општината Центар. Според Детаљниот план, максималната дозволена висина на објектот е 29 метри, а ќе се гради на површина од 1.100 квадратни метри.