Инспекцијата за труд затекна 941 непријавен работник
Државниот инспекторат за труд во јули годинава извршил вкупно 3.965 контроли од областа на работните односи и од областа на безбедност и здравје при работа. Инспекторите од областа на работните односи извршија вкупно 3.052 инспекциски надзори, од кои 2.619 редовни, 327 контролни инспекциски надзори и 106 надзори по писмени барања од странки. При контролите биле затекнати вкупно 941 непријавен работник и по донесените 327 решенија за забрана на работа на работодавецот биле пријавени 672 работници.
Инспекторите за труд донеле 63 решенија за отстранување на законски прекршувања и на други прописи и 7 решенија за одлагање на извршување одлуки, како и 15 решенија за усогласување на работното време со бројот на вработени во трговија согласно со Законот за трговија. Притоа, поднесени се и 390 барања за поведување прекршочна постапка.
Државните инспектори од областа на безбедност и здравје при работа во јули извршија вкупно 913 инспекциски надзори, од кои 744 редовни и 169 контролни инспекциски надзори и донеле 335 решенија за отстранување недостатоци од областа на безбедност и здравје при работа и 4 забрани за работа за деловни простории или орудија за работа во деловни простории. Инспекторите за безбедност и здравје при работа извршиле 59 увиди на самото место за потешки повреди на работа, од кои една со смртни последици. Поднесени се 10 барања за поведување прекршочна постапка за повреди на Законот за безбедност и здравје при работа и Законот за инспекција на трудот. (Ек.Р.) |
