Говор со празни фрази за ЕУ

Амбасади во земјата работеле цела ноќ да го преведат за говорот на премиерот

Слободанка Јовановска

Како нонсенс и „говор осуден да биде заборавен за еден ден „беше оценето во Брисел обраќањето на премиерот Никола Груевски на прославата на ВМРО-ДПМНЕ . Настапот бил проследен со големо внимание, дотаму што според неофицијални информации, некои од амбасадите во земјава работеле цела ноќ да го ислушаат и да се преведат за да бидат подготвени за реагирање. Иако главната порака ја подготвуваат за денес кога премиерот ќе има средба со еврокомесарот за проширување Штефан Филе, извори од ЕУ не штедеа зборови ни вчера за да ја опишат разочараноста од тоа што го порача премиерот на граѓаните на Македонија, а пред се', на партиските членови.

„Овој говор ќе биде заборавен што е можно побргу. Тој нема значење и во него нема порака за меѓународната заедница. Поточно би рекол тоа беше празен говор што може и натаму да се повторува, но кога и да е ќе стане јасно дека она што недостига е јасна позиција и резултат во интерес на земјата“, оцени вчера извор од Европската унија.

Во однос на впечатокот што го креираа грчките медиуми дека, сепак, нешто се движи во преговорите за името и дека двете страни се блиску до решение, според овој извор, нема потврда во зборовите на македонскиот премиер. „Треба да се биде екстремно позитивен и
великодушен, па да се најде било каков знак дека премиерот ја подготвува земјата за решителен потез, т.е. за решение“, порачува тој додавајќи дека она што го интересира сега Брисел е што ќе донесе Груевски на средбата со Филе и зошто доаѓа воопшто, ако пораката од митингот ја изнесе и пред еврофункционерот.

„Ако дојде со позициите што ги искажа на митингот, неговата посета ќе биде бескорисна“ , заклучи тој, додавајќи дека овој пат нема да биде толку важна пораката од ЕУ колку што ќе биде важно што ќе каже премиерот, бидејќи на него се чека. Тврдењата на премиерот Груевски дека во изминатите месеци се соочува со големи закани, уцени и притисоци и дека една од нив била дека ќе го симнат од власта, за Брисел се само нонсенс во кој е тешко да се поверува.

„Ако сака македонскиот народ може да го прифати ваквиот нонсенс, но несериозно е да се верува дека некој и' се заканува на ваков начин на суверена земја“, е реакцијата на овој извор. Од американската амбасада вчера не ни сакаа да го коментираат митингот на ВМРО-ДПМНЕ порачувајќи дека американската политика за прашањето околу спорот е добро позната и нема што да додадат.

Од Унијата вчера не можеа да потврдат дека по средбата на премиерот Груевски со Филе ќе има изјава за јавноста, со оглед на тоа дека во претходните вакви пригоди избегнуваа да го прават тоа, за да не му дадат шанса да креира впечаток во јавноста дека ЕУ е на негова линија и дека не е таму само за да се слика. Груевски практично ќе биде во Брисел за време на самитот на ЕУ кој почнува денеска, а на кој Македонија нема воопшто да биде тема на дневен ред бидејќи од таму ја симнаа министрите за надворешни работи пред два дена.

Иако вчера не беше потврдено дали тој ќе се најде во коридорите на Европскиот совет и ќе се сретне повторно со грчкиот премиер Јоргос Папандреу, со оглед на досегашните искуства, таквата можност не се исклучува туку напротив. Папандреу и Груевски случајно или не во Брисел престојуваат во истиот хотел „Конрад„ (патем еден од трите најскапи во градот), па не е нереално да се сретнат и таму, денес или утре. (С.Ј.)