Трајанов му се придружи на Демири
Селекторот на фудбалската репрезентација на Македонија на утрешниот контролен дуел против соодветниот состав на Луксембург ќе има на располагање само 16 фудбалери, откако при патувањето од Бургас за Софија полесна сообрајќајна незгода доживеа Ванчо Трајанов, кој поради набиеници на градниот кош мора да остане во Бугарија.
Според информациите, на автомобилот на нашиот фудбалер, кој настапува во линијата за врска, му пукнала гумата, така што Трајанов доживеа несреќа. Сепак, за среќа, тој не се наоѓа во животна опасност, неговата здравствена состојба е стабилна и Трајанов се чувствува добро. Ова беше второ откажување за селекторот Катанец, по она на Демири поради повреда. Инаку, денеска во Луксембург ќе започне пристигнувањето на репрезентативците кои ќе и' се спротивстават на селекцијата на оваа земја.
|
