Од Пекинг повик на глобална реакција против финансиската криза

Пекинг - Германската канцеларка Ангела Меркел повика да се формира нов „устав“ за глобалниот финансиски систем со поголема транспарентност, построг надзор над финансиските играчи и повисоки банкарски регулативи.

Глобалната криза е доминантна тема на Евроазискиот самит што вчера во Пекинг го отвори кинескиот премиер Вен Џијабао. На самитот присуствуваат лидери на 43 држави од Европа и од Азија.

Инаку, и вчера на берзите низ Европа продолжи тенденцијата на пад на берзанските индекси. Најдрастичен пад имаше на Берзата во Букурешт, каде што акциите во просек паднаа за речиси 15 проценти. Пад забележа и Белградската берза, чиј индекс се намали за 6,15 проценти. Индексот ДАКС 30 на Франкфуртската берза падна за 10,13 проценти, а лондонскиот ФТСЕ 100 индекс се намали за над девет отсто. Во меѓувреме, ММФ вчера ги демантира информациите дека е подготвен на голем број земји кои се соочуваат со големи финансиски проблеми да им одобри стабилизациони заеми во вкупна вредност од илјада милијарди долари. (МИА)