Македонија и БиХ сакаат повеќе да тргуваат

Трговската размена меѓу Македонија и Босна и Херцеговина, која изнесува 130 милиони долари, е на незадоволително ниво, и покрај одличните политички односи и близината меѓу двете држави. Економската соработка ќе се подобрува преку интензивирање на контактите меѓу бизнис-заедниците, соработка во туризмот и заеднички проекти, за што двете држави ќе потпишат билатерални договори. Таква оцена изнесоа македонскиот министер за економија, Фатмир Бесими, и босанскиот министер за надворешна трговија, Младен Зиројевиќ, кој е во посета на Македонија во придружба на 40-ина бизнисмени од БиХ. Ова беше прва поголема деловна средба на бизнис-заедниците од двете држави по десет години. Учествуваа фирми од прехранбената, дрвната, металопреработувачката индустрија, производство на кожа, амбалажа, производи од челик....

Според министерот Бесими, Македонија и БиХ во рамките на ЦЕФТА имаат целосна либерализација на трговијата, која се одвива без проблеми, но и покрај тоа, ниското ниво на размената бара воспоставување систем за зајакнување на соработката. „Трговската размена изнесува околу 130 милиони долари, односно 3,7 проценти од македонската трговија, со што БиХ е на 17. место меѓу трговските партнери“, изјави Бесими.

Министерот за надворешна трговија на БиХ, Зиројевиќ, ја нагласи потребата за зголемување на инвестиционите активности во двете земји. „Нашите економии се компатибилни, потрошувачите се навикнати на производи и од едната и од другата земја. Имаме слично ниво на економски развој, исти амб��ции за евроинтеграции, слична легислатива и географска близина. Тоа се многу предности и добра основа“, оцени Зиројевиќ. (Ек.Р.)