Поглед
Шкарт ОКТА-ни
 Маја Томиќ
Тоа дека ОКТА со години наназад произведува деривати со лош квалитет, поради што страдаат и автомобилите и се трујат граѓаните и околината, на сите одамна им е јасно. Но, домашните власти и одговорните во оваа компанија упорно се прават „на Tошо“. ОКТА најнормално ги продава горивата на своите бензински пумпи и никој од неа не барал и не бара да покаже со каков квалитет се тие. Тоа дека станува збор за висок неквалитет треба да ни каже Косово. Веќе втор пат за една и пол година цистерните на ОКТА не се пуштаат да влезат во Косово, затоа што надлежните утврдиле дека бензините се неквалитетни и контра европските стандарди. Овие стандарди во Косово се применуваат и тамошните власти со право не примаат сешто да им се продава на пазарот. Македонија, за жал, се' уште нема европски стандарди за горивата, иако има значително поголем државнички „стаж“ од соседно Косово.
Така, почитувани македонски граѓани, но и македонски власти, за сите подетални информации околу (не)квалитетот на бензините на ОКТА што циркулираат на домашниот пазар ќе треба да им се обратите на институциите во Косово. Очигледно тие ги имаат вистинските информации за она што ни се случува нам.
ОКТА не е технолошки подготвена за производство на квалитетни бензини, а друг увозник и да сака, не може да ги донесе на пазарот. Затоа што Владата, иако дозволи бесцарински увоз на „еуро 5“, се' уште не утврди цена по која ќе се продава ова гориво. Со други зборови, Владата, наместо да ги штити граѓаните, ја штити ОКТА, давајќи и' нови и нови рокови, наводно, за да обезбеди технологија за повисок квалитет на бензините. Но, веројатно на компанијата и' е поисплатливо да продава шкарт горива отколку квалитетни, бидејќи така има ем помали трошоци, ем поголем профит.
|
