Германија не успеа да се пласира во четврт-финалето во ракомет
Светскиот ракометен шампион во машка конкуренција, Германија, ќе мора да ги спакува куферите и да ги напушти 29. Олимписки игри во Пекинг уште по натпреварите по групи. Германците, изненадувачки, завршија на петтата позиција во својата конкуренција и не успеаја да обезбедат место во четврт-финалето. Нивниот сон за продолжување на престојот во кинеската престолнина, вчера, го урна Данска која ги совлада со убедливи 27:21. Па, последниот четврт-финален билет во групата Б заврши кај селекцијата на Русија, која освои ист број бодови како и Германците, но Русите на крајот имаа подобра гол- разлика која ги одведе меѓу осумте најдобри во Пекинг, а германските ракометари дома. Прв стрелец кај Данците, кои во четврт-финалето ќе се соочат со Хрватска, беше Ласе Босен со осум погодоци, Германците ги предводеше Михаел Краус со 6.
Русија во последното коло славеше над лидерот во групата Б, репрезентацијата на Јужна Кореја со 29:22. Во четврт-финалето „зборнаја“ ќе игра против селекцијата на Франција која во последниот меч во вчерашната ракометна програма ремизира со Полска (30:30).
Исланд на две кола докрајот на фазата по групи го обезбеди пласманот во четврт-финалето на ОИ во Пекинг. Затоа исланѓаните, вчера, како повеќе да размислуваа за она што ги очекува во продолжението на ракометниот турнир отколку на дуелот со аутсајдерот во групата Б, Египет, во кој изненадувачки ремизираа - 32:32. Нивни следен противник на ОИ 2008 е репрезентацијата на Полска. Последната четврт-финална двојка на машкиот ракометен турнир во Пекинг ја сочинуваат Јужна Кореја и Шпанија.
Двојки за четврт-финалето на машкиот ракометен турнир на Олимписките игри во Пекинг: Јужна Кореја - Шпанија, Хрватска - Данска, Русија - Франција, Исланд- Полска. |
