5 прашања 5 одговори

Здравството пропаѓа пред очите на сите граѓани

Дејан Гацов, експортпарол на Фондот за здравство

„Опасните“ реченици ми беа заменувани со „остваруваме“, вели Јасмина Јовановска


Господине Гацов, Вашата оставка предизвика голема реакција во јавноста. Што Ве испровоцира и што беше пресудно за да дадете остав��а и да излезете со вакви обвинувања против Фондот?

Не ме испровоцира ништо во моментот, туку бев разочаран од континуираното пропаѓање на здравствениот систем. Пропаѓање кое се случува пред очите на сите граѓани, Владата се обидува да го минимизира со пропагандна стратегија. Од аспект на мојата позиција видов дека тоа им е решение за се'. Не мора да функционира, не мора да е добро, но мора да се направи стратегија да се убеди народот дека е добро. Мислам дека Владата си го потценува сопствениот народ.

Не го обвинив Фондот. Фондот има буџет, кој е минимален и кој е одреден од Владата. Покрај тој минимален буџет, Владата, иако ги избира и менаџментот и сите седум члена на УО на Фондот, нема доверба во сопствениот избор, бидејќи не им дава независно да работат. Многу одлуки што го разболеа македонското здравство не се донесени на адреса на ФЗОМ – „Македонија“ бб ниту на адреса на Министерство за здравство, туку се донесени на „Илинденска“ бб во Владата на РМ. Не ми е јасно само зашто премиерот има интерес да го уништува македонското здравство.



Директорката Маја Парнарџиева-Зм��јкова рече дека како стоматолог не ја разбирате економијата и не можете да ги коментирате економските работи.

Не би ги коментирал изјавите на госпоѓата Парнарџиева-Змејкова. Таа добро знае колку јас ги разбирам работите, од економски и од човечки аспект. Не верувам дека таа смета оти не ги разбирам работите, едноставно, на тој начин и' е кажано дека треба да настапи медиумски. Нејзините зборови ми личат како партиско соопштение од една од македонските партии. Тоа е исто како некој за неа да каже дека не е компетентна да е прв човек на институција од која зависи квалитетната здравствена заштита затоа што е економист и луѓето ги гледа како бројки, што не е вистина.

Дупката во Фондот е голема. Но, зар треба јас да ви го кажам тоа? Прашајте ги родилките колку месеци не го зеле своето загарантирано породилно боледување. Колку месеци не зеле капитација матичните лекари, стоматолози и гинеколози? Апсурден е фактот што доколку до 15. во месецот матичниот доктор не исплати бруто-плата, односно не ги регулира своите придонеси кон УЈП, ќе биде ригорозно казнет, а истовремено никој не одговара доколку државата не ги регулира своите обврски кон докторите. Едноставно, Фондот нема пари за исплата. А нема затоа што Владата навреме не му префрла на Фондот, односно не ги исполнува финансиските обврски според сопствените проекции. Доведувајќи се во таква ситуација, Владата премина кон единствениот можен чекор, а тоа е кратење од тие финансиски средства - од намалување на достапните лекови на граѓаните, од скратување на капитациониот бод на матичните доктори, од неисплатување на родилките итн.



Кога ја напуштивте функцијата изјавивте дека заминувате зашто повеќе не можете да лажете.

Точно. Излегов затоа што не можам повеќе да лажам. Мојата професионална должност како портпарол беше да му го кажувам на народот она што ќе ми кажат да го соопштам. И не би требало тоа да ве чуди доколку земете предвид дека самите директори го кажуваат тоа што им е издиктирано од премиерот. Но, мислам дека секоја личност треба да има свест за својот народ и секоја личност има своја граница. Мојата беше тука. Не можев веќе да спроведувам пораки што ќе креваат рејтинг. Не можев секогаш кога ќе се обидам да му соопштам на народот што се случува со здравството „опасните“ реченици да бидат ревидирани и избришани и заменети со „остваруваме“. Како портпарол јас бев гласноговорник, кој кажува она што му е кажано, но не бев таму по секоја цена - најмалку по цена на иднината на македонскиот народ.



Што ќе преземете ако Фондот ве тужи?

За што да ме тужи? Немам направено никаков криминал, така што нема основа за каква било тужба.



Настапот по оставката Ви беше како политичар. Дали утре може да го видиме Гацов во некоја политичка партија?

Настапот беше како на граѓанин што е загрижен за иднината на здравството и на цела држава, а и како на човек што искрено настапи и ги лоцира проблемите на вистинската адреса.