Наезда од крлежи во парковите

БИТОЛА - Крлежи ги нападнаа парковите и тревниците. Како никогаш порано по четириесетина граѓани неделно бараат лекарска помош поради каснување од крлеж. Од опасните инсекти подеднакво страдаат и децата и возрасните. Горештините, промената на климатските услови и влажноста е причината за нагло размножување на крлежите. Згора на се', Општината не одлучила по тендерот кој да запрашува против опасните инсекти. Целата постапка доцни со недели.

„Дневно имаме пет до шест интервенции поради каснување од крлежи. Вака не било никогаш. Крлежите напаѓаат не само по парковите и по отворените зелени површини туку и по дворовите. Луѓе се каснати од инсектот додека ја коселе тревата во својот двор“, потврдува Благој Јовановски, лекар во ургентна медицина во битолската клиничка болница.

Од службата за итна медицинска помош велат дека кај нив се случува да се јават по три до четири случаи дневно. Оттаму апелираат граѓаните да не се обидуваат сами да го извадат инсектот од своето тело, туку да побараат лекарска помош.

„Доаѓаат луѓе за да им го извадиме крлежот од телото откако претходно се обиделе да го сторат тоа сами, но неуспешно. Ако остане само мал дел од инсектот во човековото тело, може да предизвика и други компликации, бидејќи тие се преносители на заразни болести“, предупредува Христо Бојаџиев, лекар во Итната медицинска помош во Битола. (A.Б.)