Узурпирани тротоари на две улици во Гостивар
ГОСТИВАР - Инвеститорот на трговскиот центар што се гради на аголот на булеварот „Гоце Делчев“ и „Илинденска“ во Гостивар ги узурпира тротоарите на двете фреквентни сообраќајници. Со бетон ја подигнува височината на тротоарите за околу половина метар.
Гостиварци реагираат на самоволието на инвеститорот „Гетро“, бидејќи пешачкиот простор, кој повеќе од две години беше заробен поради изградбата, сега сопственикот го пренамени за трговскиот центар. Тие сметаат дека е голема дрскост да се посегнува по државен имот, наменет за сообраќајни комуникации и тоа во центарот на градот.
Како што неофицијално дознаваме, трговскиот центар ги пречекорил димензиите на градежната линија, што е спротивно со важечкиот ДУП за овој урбан блок.
„Мислам дека тротоарите нема да бидат узурпирани, туку ќе бидат изградени според сите европски стандарди“, убеден е гостиварскиот градоначалник Невзат Бејта. Тој коментира дека секоја нова работа граѓаните ја примаат негативно, а кога ќе ги видат добрите работи, тогаш ќе прифатат. Така, вели Бејта, ќе биде и со овие тротоари.
Гостиварци сметаат дека локалната самоуправа им дозволува на одделни инвеститори да бидат урбанисти и да менуваат урбанистички решенија во градот по нивно наоѓање. Тоа придонесува да завладее невиден хаос во градежништвото. (К.К.)
|
