Претходен број

СДСМ дебатира за лидер, но Бранко Црвенковски веќе ја зеде палката во свои раце

Атмосферата во СДСМ драстично е сменета по гповикот на Црвенковски до Груевски да се соочат на избори

Соња Крамарска

Во СДСМ се' уште владее молк по бомбастичната изјава на претседателот Бранко Црвенковски од минатата седмица дека нема да се соочи со Груевски на претседателски избори, туку на парламентарни. Читано меѓу редови, со овој настап Црвенковски практично ги стави во аут сите во процедурата за избор на лидер на СДСМ и најави дека тој се враќа на голема врата во партијата.

Според партискиот календар, почнувајќи од 20 август, локалните разграноци на социјалдемократите ќе можат да даваат предлози за партиски лидер. Дали Црвенковски пораката за својата намера да си ги одмери силите со Груевски на парламентарни избори му ја прати само на својот ривал од ВМРО-ДПМНЕ или и на ривалите од СДСМ, па дури и на партиското членство?

На ова прашање засега никој од кампот на социјалдемократите не може да даде одговор, затоа што, според наши извори, таму атмосферата драстично е сменета по минатонеделното громогласно ветување на Црвенковски дека ќе му биде противкандидат на Груевски за премиер.

„Она што сега најверојатно ќе се случи во СДСМ е да биде избран лидер кој по враќањето на Црвенковски во партијата ќе одлучи дали ќе му го отстапи нему кормилото или, пак, ќе му биде најдено друго соодветно место на Црвенковски“, вели Ѓорѓи Спасов, член на сениорската екипа на социјалдемократите и познат политички аналитичар.

Според наши извори, во СДСМ веќе направиле и подготвителна анкета меѓу своето членство за тоа каква треба да биде стратегијата на партијата во битката против ВМРО-ДПМНЕ и Груевски. „Додека ја правевме анкетата, се случи трибината на Црвенковски во Охрид, на која тој првпат навести дека нема да се кандидира за втор мандат, а потоа и јавно ја соопшти одлуката, што одекна како повик за мобилизација до нашето членство кое речиси едногласно побара Црвенковски повторно да ја земе лидерската палка“, тврди овој извор.

Лобито на Црвенковски во меѓувреме станало мошне силно во СДСМ. Него го предводат генералниот секретар Горан Минчев, потпретседателот Игор Ивановски и пратеникот Андреј Петров. Процените се дека некој од нив не би имал ништо против да му го грее столчето на Црвенковски додека тој ги одбројува последните денови како претседател на државата.

Извори што се блиски до Црвенковски велат дека тој бил разочаран што СДСМ не реагирал на нападите на ВМРО-ДПМНЕ против него и против чинот на аболицијата на Заев. „СДСМ ја бараше аболицијата, а потоа се повлече пред нападите на ВМРО-ДПМНЕ“, велат приврзаниците на Црвенковски.

Впечаток е дека во СДСМ владее парализираност по последните настани на апсењето на Зоран Заев и неговото ослободување со аболицијата од Црвенковски. Единствени кои се присутни во јавноста се Ѓорѓи Спасов, Никола Поповски, Владо Бучковски, како и претседателот Бранко Црвенковски, кои во моментов му припаѓаат на таканаречениот тим надворешни играчи.

„Поразително е ��то последниот настап на Црвенковски го коментираат во Владата, дипломатите, аналитичарите, единствено ние во СДСМ молчиме“, велат разочарани членови од партискиот врв на социјалдемократите.

Во СДСМ неофицијално се вели дека со минатонеделните изјави Црвенковски практично јавно ги изразил своите амбиции повторно да биде лидер на СДСМ. „Како што стојат работите, никој нема волја да му се спротивстави на Црвенковски, бидејќи во овој момент преовладуваат анализите дека на режимот што владее во десницата единствено може да му се спротивстави таков режим од левицата, односно лидер-автократ, како што е случај со Груевски и со ВМРО-ДПМНЕ“, велат истакнати членови од СДСМ кои сакаат да останат анонимни. Меѓутоа, констатираат и дека на тој начин се намалени сите шанси за кадровска иновација на СДСМ.

„Она што моментно го гледаме во државата е национал-социјализам од страна на Груевски кој сите не' влече за нос и се повикува на својот висок рејтинг“, вели сдсмовски аналитичар кој смета дека само Црвенковски може успешно да се спротивстави на еден таков концепт на Груевски.

„Црвенковски сфати дека како претседател нема можности да влијае на случувањата во државата и затоа испрати јасна порака дека се враќа и тоа како лидер на СДСМ“, вели истиот аналитичар.

Она што моментно може со сигурност да се види е дека додека СДСМ бавно се движи низ партиските процедури и подготвува конгрес на кој досегашната претседателка Радмила Шекеринска ќе ја предаде лидерската палка на некој друг, Црвенковски громогласно соопшти дека наследникот е тука, но треба да се почека да му заврши претседателскиот мандат. Во СДСМ ништо не е исто по минатонеделниот настап на Црвенковски. Очигледно ги затече и нив како што го затече ВМРО-ДПМНЕ.