Фармерите се премислија - не се откажуваат од штрајк
Битола - Македонските фармери се премислија, не се откажуваат од предупредувачкиот штрајк, најавен за утре, иако викендов во Битола беа катагорични дека постигнале договор со млекарниците за откупната цена за што посредуваше Владата. Пелагониските фармери тврдат дека информациите што беа пласирани во медиумите за надминување на млечната криза не се точни затоа што тие не се согласуваат литар сурово млеко да им биде плаќано под 29 денари и не го прифаќаат ставот на Владата цената да се движи од 19 до 29 денари за литар.
,,Фармерите на 20 август ќе организираат предупредувачки штрајк со бојкот на откупот на млекото и блокирање на центрите низ целата држава , бидејќи не сме задоволни од цената што ја понудија млекарниците“, изјави вчера во Битола, Бранкица Мавчева од ФФМ.
На прашањето дали се работи за раскол меѓу фармерите, бидејќи нивниот претседател Ѓоко Данаилов во саботата јавно го поздрави предлогот н а Владата за плаќање на млекото според квалитетот, со напомена цената да не биде пониска од 20 денари, Мавчева вели дека тоа било недоразбирање. „Не станува збор за раскол, туку за лично недоразбирање, бидејќи млекарниците се обврзаа да работат според правилникот за откуп на млеко, а не се придржуваат, зашто на фармери им се плаќа дури и по 11 денари за литар млеко. Ние бараме 29,37 денари за минимум квалитет на млекото. Министерството најверојатно немаше целосна информација за состојбите во млекопроизводството “, објаснува Мавчева. Фармерите сметаат дека, за да им се исплати нивната мака, но и трошоците на млекарниците, млекото треба да се продава според европски цени.
Доколку утре се оствари предупредувачкиот штрајк на фармерите, непредадени ќе останат неколку стотици тони литри млеко кое дневно го откупуваат четирите големи млекарници во државата. (А.Б.) |
