Паричен надомест од државата побарале 6.553 стечајци
Вкупно 6.533 работници со над 25 години работен стаж и нерешен социјален статус поднеле барање за добивање месечен паричен надомест од државата до 15 август, покажуваат податоците на Агенцијата за вработување.
Исплатата на паричниот надомест е предвидена со Законот за материјално обезбедување на невработените лица поради приватизација на претпријатијата со доминантна сопственост на државата од 2000 до 2004 година, кој беше донесен по барање на Здружението на стечајните работници со над 25 години работен стаж и нерешен статус.
Работниците почнаа да доставуваат апликации до Агенцијата за вработување по 23 јули, откако Законот стапи во сила. Крајниот рок за доставување барање за паричен надомест е 21 август. По тој датум надлежни комисии ќе ги анализираат документите што ги доставиле стечајците, по што ќе следува исплатата. Надлежните во Агенцијата велат дека не можат да предвидат за колку време ќе заврши анализата и стечајците ќе почнат да земаат пари, но нагласуваат оти тие ќе имаат право на паричен надомест од датумот кога го поднеле барањето.
Согласно со член 4 од Законот за материјално обезбедување на невработените лица поради приватизацијата на претпријатијата со доминантна сопственост на државата во период од 2000 до 2004 година, невработеното лице има право на месечен надоместок во висина од 34 проценти од просечно исплатената месечна нето-плата по работник во државата за претходната година. Според сегашните статистички податоци, стечајците треба да земаат по 5.000 денари месечно, но тој износ ќе се менува со промената на износот на просечната плата. (МИА) |
