Светот се соочува со жед за вода
Иако неодамна глобалното внимание се фокусираше на енергијата и на храната, глобалниот самит што ќе се одржи неделава во Стокхолм, Шведска, ќе дискутира за клучниот проблем околу водата. Самитот „Недела на водата во светот“ почна вчера и на него ќе бидат обновени апелите за решавање на растечките предизвици од санитетско-здравствени мерки, климатските промени и водата за пиење. Санитетско-здравствените мерки се едни од најважните глобални проблеми. Организаторите посочуваат дека недостигот од соодветни санитетско-здравствени мерки е скандал што чини 1,4 милиони детски животи секоја година. Инвестирањето во оваа област, велат научниците, е најефективна интервенција во здравјето што би можел да ја направи светот.
Додека глобалните загрижености околу енергијата и храната се реални, експертите наведуваат дека справувањето со клучните проблеми со водата е посуштинско за светот и итно е потребна долгорочна акција. Две илјади и петстотини експерти ќе разговараат дали светот ќе има доволно водни ресурси за да се справи со зголемувањето на населението. До 2025 година 1,8 милијарди луѓе ќе живеат во региони со апсолутен недостиг од вода. Меѓутоа постигнувањето политички договор за тоа како да се подели или заштити водата изгледа многу далечно. Секоја дискусија за проблемот со водата, исто така, ќе треба да одговори и на климатските промени. Од неодамна научниците беа во можност да ги утврдат влијанијата на зголемувањето на температурата врз водниот циклус. (Би-Би-Си) |
