Црквата го купи земјиштето на плоштадот
Советот на Центар утре ќе одлучува за иницијативата
околу референдумот Деспина Трајковска
Црковните власти не се засегнати од евентуалното распишување референдум за црквата на скопскиот плоштад, за што утре на седница ќе одлучува Советот на Општина Центар. Не стравуваат дека проектот принудно може да се стави на стенд-бај доколку се одлучи граѓаните на Центар да го кажат своето мислење околу идејата за изградба на „Свети Константин и Елена“ на плоштадот „Македонија“. Затоа што во меѓувреме црквата го откупила и државното земјиштето на плоштадот и тоа со непосредна спогодба по повластени услови и цена уште на 23 јули.
Иако тоа де факто ќе значи усложнување на и онака проблематичниот тек на реализацијата на проектот, црковните власти паралелно работат на негова реализација. Ниту претпоставките на евентуалниот референдум жителите на Центар да се изјаснат против изградбата на црквата не ги колебаат во МПЦ, иако исходот од сондажата на граѓаните ќе биде обврзувачка за реализација. Од МПЦ велат дека деновиве очекуваат и официјално да добијат надлежност за изградба на храмот, односно на нивна адреса да стаса комплетната документација за проектот која се' уште е кај Министерството за култура.
Од Министерството за транспорт вчера само потврдија дека со МПЦ го потпишале купопродажниот договор за земјиштето на плоштадот, но не одговорија за колкава сума атрактивната парцела од 1.525 квадратни метри стана сопственост на црквата. Посочија дека цената е пресметана согласно со важечките уредби.
Неодамна, кога државата по реакциите на јавноста одлучи на МПЦ да не и' го подарува земјиштето, туку да и' го продаде, од ресорното министерството информираа дека цената по квадратен метар ќе изнесува 1.800 денари, што значи дека за земјиштето на плоштадот МПЦ ќе треба да плати нецели 45.000 евра.
„За речиси толкава сума ја купивме парцелата“, ни изјави вчера Коста Станоевски, секретар на Скопската епархија. Според него, во целиов случај МПЦ не ја тангираат пишувањата во медиумите околу наводното бришење на маркичката за изградба на верскиот објект во срцето на Скопје. „Целиот случај непотребно се проблематизира и се политизира. Земјиштето за црквата го купивме, на парцелата е предвидена намената и чекаме само да ја добиеме документацијата од Министерството за култура, односно идејното решение како би постапувале понатаму. Значи, работата е јасна. Ние ќе градиме, а кога ќе почнеме, зависи од одлуката на комисијата која е задолжена за преземање на чекорите за реализација на проектот“, изјави вчера Станоевски за „Утрински весник“. Тој не беше расположен да коментира за иднината на проектот во случај на распишување референдум на кој граѓаните на Центар евентуално би се изјасниле против изградбата на црквата.
Инаку, од МПЦ велат оти се' уште не е сигурно дека објектот ќе се гради токму по веќе избраниот проект. Можно е тој да претрпи одредени корекции. „Сето тоа ќе зависи од стручната комисија која има обврска да ја реализира целата постапка за проектот“, дополни Станоевски. Тој и вчера не сакаше да посочи од каде МПЦ ќе соберe милионски суми за да ја изградат црквата. „Многу прашувате. Ќе видиме. Секогаш има заинтересирани донатори, фирми што сакаат да помогнат во изградба на храмови“, изјави Станоевски. (Дс.Т.)
|
