Наум Петрески

пејач

Денес е Свети Наум и чекам гости во Струга на именден. Имам уловено дваесетина килограми струшка плашица, мрена, а ќе се најде и некоја пастрмка за именденот. Од утре пак почнувам со подготовките за настапот со Калиопи на „Сунчане скале“ во Херцег Нови на 8 јули. Сепак, таму ќе бидеме еден ден порано.

Здравкица Билбиловска

радио и ТВ-водителка

Денеска ја подготвувам емисијата „Ѕвезда“, која в недела ќе се емитува на радио Метрополис, а гостинка ми е Надица Георгиевска. Откако ќе ги завршам работните обврски, веќе го планирам викендот, а в недела во Струмица ќе водам караоке-шоу.

Петар Мирчевски

актер

Дојде летото и ништо не работам. Се шегувам, но така некако излегува. Ми заврши снимањето за оваа сезона на серијата „Збогум, Румелија“, заврши сезоната во театар, па нешто читам, шетам до викендичката, муабети со битолчани на Широк сокак... и минува денот. Одморот не го планирам, зашто секогаш нешто ми се менува, па ако одам, заминувам „неплански“.