Зоран Љутков

актер

Денот ми започнува со сумирање на впечатоците од синоќешното отворање на Фестивалот на античката драма во Стоби, со претставата „Александар“. Долго го подготвуваме овој фестивал и целосно се вложуваме во него, а верувам дека и ова издание, што ќе трае до 30 јули ќе биде успешно. Инаку, денот го минувам во хотел „Романтик“, на езерото Младост, со гостите од Ерменија, кои утре имаат претстава.

Вања Лазарова

пејачка

Денеска е важен ден во нашето семејство - 5. роденден на внукот Дамјан, па се разбира дека тој и сестра му, тригодишната Матеја Вања, се во центарот на вниманието. Ги сакам овие семејни дружења и радости, исто како што ме радуваат и настапите, како оној во неделата во Битола, а и оној што ме очекува на „Охридско лето“.

Жанко Голабовски

радиоводител

Нов ден, нов касмет, па и денеска се надевам на весел ден. Од 10 до 14, редовно си ја водам емисијата на радио, „Охрид, не бери гајле“, што значи дека треба да им го берам гајлето на сите. Сепак, ќе најдам време за на плажа, пред да го пречекам Дино, на аеродром. Така си тече летото и чекаме да дојде септември, ха, ха.