Претходен број

За мали лаптопи, големи 10 млн. евра 

Не се знае колку точно на крајот ќе чини компјутеризацијата на училиштата

Жаклина Хаџи-Зафирова

Уште не е докрај реализиран проектот „Компјутер за секое дете“, а Владата го преклопи со уште еден проект, за набавка на лаптоп-компјутери за основците и за професорите. Владата набавува 75 илјади мали лаптопи во вредност од над 10 милиони евра, кои се очекува учениците да ги добијат најдоцна до крајот на учебната година. Лаптоп-компјутерите ќе отидат во рацете на основците од прво до трето одделение, а исти вакви машини ќе добијат и сите наставници и професори во основните и во средните училишта кои, доколку сакаат, овие подвижни компјутери ќе може да ги носат и дома. Од Владата објаснуваат дека идејата за лаптопите ја добиле откако претходно спровеле пилот-проект во училиштата за користење вакви компјутери.

Со овие дополнителни 10 милиони евра и претходните дваесетина милиони кои Владата ги издвои за набавка на компјутери не се знае колку точно на крајот ќе чини компјутеризацијата на училиштата. Проектот, покрај доцнењето, сега се соочува со други проблеми со кои надлежните не знаат како да излезат накрај.

Покрај тоа што компјутерите во училиштата не се употребуваат, бидејќи се' уште не се готови програмите за предметите и обуките за наставниците, не се знае ниту судбината на самите компјутери. Се крадат „глувчиња“, се демолираат простории, а професорите целосно се незаинтересирани да се образуваат компјутерски. За овие забелешки наголемо се зборува во Министерството за информатичко општество, каде што се размислува за можни санкции за наставниците. Во Министерството не се согласуваат со критиките дека проектот е осуден на пропаст и додаваат дека вистинските ефекти ќе се видат со тек на време.

Надлежните објаснуваат дека со лаптопите целосно се заокружува компјутеризацијата на училиштата, бидејќи со проектот „Компјутер за секое дете“ не било предвидено да се набават компјутери за учениците од прво до трето одделение. Затоа сега Владата набавува 53 илјади лаптопи (со екран од 8,9 инчи) за основците и 22 илјади за сите наставници и професори во основните и во средните училишта. На наставниците и на професорите ќе им се дозволи компјутерите да ги носат дома, наводно, за да им се излезе во пресрет при подготовката на материјалите.

„Отворањето на понудите за тендерот ќе биде на 26 јануари. Претходно направивме пилот-проект во училиштата каде што беа употребени вакви лаптопи со помош на УСАИД и УНДП. Тоа имаше многу добар ефект кај учениците и кај професорите. Затоа и решивме да го спроведеме проектот со набавка на лаптоп-компјутерите“, велат во Министерството за информатичко општество.

Министерството моментно се соочува со куп проблеми поради поставените компјутери во училиштата. Од Министерството ги предупредиле директорите дека поради зачестените кражби и оштетувања на опремата, отштетата ќе треба да ја плати училиштето. Проблем е и тоа што компјутерите не се користат, туку чекаат на професорите да ги вклучат, кои пак имаат отпор да научат да ракуваат со компјутерите поради тоа што се работи за лица во поодминати години.

Министерот за информатичко општество, Иво Ивановски, изјави дека никој не им е виновен на наставниците што не ги користат компјутерите. Но, од друга страна, тие велат дека немаат друг избор освен да чекаат на компјутерските програми и најавената обука што постојано им се пролонгира.

Дополнителен проблем за надлежните министерства е и тоа што дел од компјутерите се' уште се наоѓаат во државни магацини, каде што им истекува гарантниот рок. Загриженост поради ова изрази и Државниот завод за ревизија, кој во својот последен извештај наведе дека „доцнењето на инсталацијата го намалува гарантниот рок на компјутерите“. Ревизорите укажале и дека во моментот на ревизијата извршена годинава складираните компјутери не биле осигурани, а Министерството за образование и наука ги осигурало само за период од јануари до март 2008 година.