Претходен број

Истражниот судија останува на одлуката Заев да се брани од слобода

Судијата Седат Реџепагиќ побарал од осомничените секој понеделник да се јавуваат во судот во Струмица

Љубиша Станковиќ

Истражниот судија Седат Реџепагиќ останува на својата одлука Зоран Заев и другите петмина осомничени за наводни злоупотреби околу изградбата на трговскиот центар „Глобал“, и натаму да се бранат од слобода. Со ваквото решение, тој практично ја потврди својата претходна одлука, откако Кривичниот совет на скопска „единица“ пред два дена му го врати „жешкиот костен“ наречен Заев. Имено, Кривичниот совет ја прифати жалбата на Обвинителството, во кое се тврди дека осомничените ќе можат да влијаат на сведоците, но не изрече притворска мерка, туку одлуката му ја препушти на истражниот судија. Единствената новина е што во новото решение Реџепагиќ внесе и дополнителен услов за осомничените, а тоа е секој понеделник да се јавуваат во струмичкиот суд.

Истражниот судија во првичната одлука оцени дека осомничените нема да влијаат врз сведоците и дека не се во можност да го повторат делото. Тој им ги одзеде пасошите на Заев и на општинските работници и им забрани да ја напуштаат Струмица. Полицијата ги осомничи за нелегален тендер и изградба на градскиот трговски центар „Глобал“.

„Точно е дека предметот е вратен, а точно е и тоа дека од мене се очекува повторно да одлучувам.

Она што можам да го кажам засега е дека ќе постапувам крајно совесно и професионално и дека немам намера да подлегнувам на какви и да е притисоци“, ни изјави вчера судија Седат Реџепагиќ.

Првично судијата Реџепагиќ утврдил дека со превентивната мерка забрана за напуштање на живеалиштето или престојувалиштето се исклучува опасноста осомничените да се дадат во бегство, дотолку повеќе што станува збор за лица кои се семејни и вработени луѓе и кои никогаш пора��о не биле во судир со законот. Истражниот судија ценел дека не е можно делото за кое се осомничени лицата да ја попречуваат истрагата, бидејќи претходно веќе била прибавена целата документација, а со оглед на тоа што се работи за објект што е веќе изграден не е можно да дојде до повторување на делото.

Иако истражниот судија нема донесено нова одлука, сепак, тешко е да се поверува дека тој ќе ја промени првично донесената одлука со која наместо притвор предвидел превентивна мерка. На ваков заклучок упатува и завчерашното појавување на раководителот на Секторот за правни, административни, општи работи и јавни дејности во Општина Струмица, Кирил Парталов. Станува збор за третиот од шестемина осомничени, а кој минатиот четврток, кога се случија приведувањата, беше надвор од државата. Парталов, како што дознаваме, разбрал дека и тој е осомничен за злоупотреба на службената положба, но не успеал да стигне да даде своја одбрана во исто време кога тоа го сторија и неговите колеги. По исказот што го дал во вторникот, Парталов бил пуштен да си замине од судот.

Со најновата одлука на Кривичниот совет се запознати и бранителите на осомничените. Адвокатот Љубомир Михајловски вели дека за одлуката разбрал од медиумите и дека чека да ја добие, а за адвокатот Мирослав Вуиќ се шпекулира дека го прекинал годишниот одмор и дека поради новонастаната ситуција се враќа во земјава.

По минатонеделните приведувања, односно за случајот „Глобал“ со свое соопштение до домашната јавност и до меѓународните институции вчера се произнесе и самиот Заев. Градоначалникот на Струмица, кој е и потпретседател на СДСМ, смета дека „отстрелот на политичките неистомисленици со власта во Република Македонија добива загрижувачки димензии. Обидите на негова политичка елиминација и дискредитација, но и за нарушување на човечкото достоинство, низа разни притисоци, конструкции и закани, траат подолго време, а кулминираа со обвинувањата за злоупотреба на службената должност со изградбата на градскиот пазар во Струмица“. Градоначалникот потсетува дека Обвинителството и МВР „својата хајка против него и неговите соработници“ ја насочуваат на три пункта: непочитување право на денационализација, на прекршувањето на Законот за јавни набавки и на изградба на објект на државно земјиште, а без согласност на Владата.

По првата точка Заев појаснува дека процесот на денационализација е завршен со правосилни судски постапки со кои се отфрлени новите барања за денационализација и дека од 1968 година на предметниот простор е изграден струмичкиот пазар што стои во сите генерални урбанистички планови. За непочитувањето на Законот за јавни набавки градоначалникот вели дека за потребите на новиот објект не набавила ништо, но дека во една редовна постапка е избрана фирма коинвеститор. За самата изградба на ТЦ „Глобал“, Заев вели дека согласно со законските прописи не е можно да се гради на земјиште доколку тоа не е во државна сопственост и дека, доколку станува збор за приватно земјиште, ќе треба да се изврши експропријација, а кога тоа ќе биде сторено како нов сопственик повторно ќе треба да биде впишана Република Македонија. Заев потсетува дека со струмичкиот пазар такво нешто било сторено уште во 1957 година и дека оттогаш како корисник на земјиштето се води ЈПКД „Комуналец“ од Струмица, кое има законско право на градба согласно со Генералниот и Детаљниот план од 1987 година.

За злоупотреба на службената положба Јавното обвинителство, покрај градоначалникот Зоран Заев, ги товари и Стојан Динев (55), раководител на Секторот за урбанизам, комунални работи и заштита на животната средина, Кирил Парталов (47), раководител на Секторот за правни и административни работи, Никола Годев (42), раководител на Одделението за административна поддршка на струмичкиот градоначалник, Иринка Трајкова (61), урбанистички инспектор и овластен градежен инспектор на Струмица, и Горан Крстев (30), сопственик на фирмата „Де-лукс инженеринг“.