Претходен број

Трифун Костовски се повлече од ракометот

Женскиот клуб Ѓорче Петров остана без спонзорот „Кометал“, РФМ без претседател

Роберт Димитриевски


Кометал Ѓорче Петров од вчера и официјално е минато, барем под тоа име, откако спонзорот Трифун Костовски на прес-конференција објави дека целосно се повлекува од ракометниот спорт, поднесувајќи оставка и од функцијата претседател на Ракометната федерација на Македонија. Најтрофејниот спортски колектив во Македонија на само шест дена од стартот на Регионалната лига остана без главниот финансиер во последните 15 години, со чија поддршка ги досегна европските височини, а РФМ без првиот човек во пресрет на најголемиот спортски настан во државава по осамостојувањето - декемвриското Европско првенство за сениорки.

„Одлуката не ја донесов лесно, но се' има почеток и крај. Идејата да влезам како спонзор ми беше да ги поттикнам стопанствениците и државата да вложуваат во спортот, но не успеав. Не можам повеќе да ги следам финансиските потреби на клубот, што се одрази на резултатите во последните две години. Буџетите на големите ракометни клубови годишно растат за 20-30 проценти и тоа е премногу за мене“, со видлива разочараност изјави Костовски. „Со голема жал го соопштувам ова. Многу ми е криво, бидејќи бевме во врвот на европскиот клупски ракомет, но тие времиња поминаа, денес дуваат други ветришта и затоа се повлекувам за да влезе некој друг во клубот. За 15 години донесовме многу радост на нацијата и тоа ме исполнува“.

Во врска со Федерацијата, пак, Костовски информира дека на 21 август престанал да ги финансира сите женски национални селекции.

„Тие не се интерес на поединец, туку и на државата. Поднесувам оставка и од РФМ откако се договорени сите детали со државата околу организацијата на ЕП“, појасни најголемиот спортски мецена во самостојна Македонија. Тој ја отфрли сугестијата дека овој чекор го презема поради влегувањето во фудбалскиот клуб Вардар: „Вардар нема врска со ова. Факт е дека во фудбалот се враќаат парите, а може и да се заработи. Од друга страна, Вардар годишно чини 50 отсто помалку од Кометал Ѓорче Петров“.

Клупскиот претседател Иван Бојков му оддаде признание на долгогодишниот спонзор.

„Соработката даде исклучителни резултати во македонскиот женски ракомет. Клубот стана ракометен бренд со три финалиња во Лигата на шампионите, со една европска титула, со десетгодишно учество во групите од ЛШ“, рече Бојков. „Потегот на Костовски е негова желба, не наша, но очекуван, бидејќи не познавам друг пример во кој било спорт една личност 15 години да спонзорира клуб со врвни резултати. Костовски се вложи и лично во клубот, а клупските успеси се одразија и на репрезентативен план. ЕП е круна на тоа“.

Бојков за утре најави состанок со ракометарките, на кој ќе побара трпение од нив во следните 30 дена, колку што ќе трае потрагата по друг(и) спонзор(и).

„Ако не успееме, тогаш ќе им дозволиме да си најдат друг ангажман. Од епилогот на разговорите со потенцијалните финансиери ќе зависи судбината на клубот, односно дали ќе се натпреварува во Европа или само во македонското првенство, па дури и дали ќе згасне“, објаснува Бојков. Според него, за една сезона се потребни 550-600 илјади евра. За споредба, просечните тимови трошат над еден милион евра, а врвните 3-5 милиони годишно. Во врска со Регионалната лига, тој вели дека над 50 отсто од трошоците ги подмирува организаторот на натпреварувањето.

Како свои можни наследници во РФМ Костовски ги наведе двајцата потпретседатели Иван Бојков и Михајло Михајловски, како и членот на Управниот одбор, Минчо Јорданов.