Масовен протест поради апсењето на Зоран Заев

Протестот пред судот не излезе од контрола кога специјалците го попречија движењето на поддржувачите на Заев

Билјана Јовановска
Љубиша Станковиќ

Зоран Заев, градоначалникот на Струмица и потпретседател на опозицискиот СДСМ, вчераутро беше уапсен на пат кон Скопје, откако полицијата го запре неговото возило на раскрсницата кај Радовиш. Заедно со уште четворица свои сограѓани С.Д.(54), Н.Г.(41), И.Т.(60) и Г.К. (29), кои како и Заев се обвинети за „злоупотреба на службената положба и овластување“ и „помагање“, претпладнето пред 11 часот со комбе беа донесени на распит во Основниот суд Скопје 1. Полицијата трага по лицето К.П. (46) од Струмица, кое се товари за истото дело.

Веднаш по информациите за апсењето на Зоран Заев, опозицискиот СДСМ одлучи да ја напушти работата на Собранието зашто сметаат дека нивното присуство во парламентот претставува своевидната „шминка“ за потезите на власта и создава привид за демократско функционирање на законодавниот дом.

Попладнето, околу 14 часот, лидерката на СДСМ Радмила Шекеринска, со целата пратеничка група, и опозиционата ЛДП пеш се упатија кон судот, каде што им се приклучија голем број граѓани од повеќе градови. Таму, пак, веќе имаше голем број полицајци, инспектори, припадници на Единицата за брзи интервенции, попознати како „нинџа желки“. По информациите дека голем број автобуси од повеќе градови се спречени да стасаат до Скопје, тензиите почнаа да раснат. Напнатоста кулминираше кога учесниците на протестот, предводени од Шекеринска, се обидоа да застанат на просторот од десната страна на судот. Притоа, се случи близок контакт со „нинџа желките“, кои под полна опрема и со штитови ја потиснуваа толпата кон улицата. И покрај инсистирањата на лидерката на СДСМ дека граѓаните имаат право на слободно движење, дека тие не атакуваат на институциите на системот, специјалците го попречија нивното движење, по што Шекеринска прокоментира дека „некој сака полицијата да ја злоупотреби, да ја сврти против сопствениот народ“ и ги повика припадниците на МВР да го „прекинат насилството“. Неофицијално, попладнето зад зградата на судот стасаа три транспортери со специјалци, а проструи и веста дека било побарано полициско засилување и од другите градови.

И покрај овој инцидент, Шекеринска и неколку илјади граѓани останаа пред Основниот суд Скопје 1. Во меѓувреме, потпретседателите на СДСМ Игор Ивановски и Јани Макрадули имаа куса средба со потпретседателката на судот Ангелина Поповска, но не соопштија за што разговарале. Распитот на Заев траеше полни четири часа, точно до 15 часот, а потоа по десетминутна пауза истражниот судија Седат Реџепагиќ и заменик-јавната обвинителка Гордана Гешковска го продолжија распитот на останатите обвинети, кој не заврши до затворањето на весникот.

Оние што се обидоа на Заев и на останатите осомничени да им ја дадат поддршката со своето присуство пред судот, главно беа попречувани да стасаат до Скопје. Полицијата ги сопирала автобусите, ги легитимарала патниците и барала да изврши технички преглед на возила. Откако дел од нив пристигнаа пред судот, извикуваа „Не го даваме Заев“ и „Зоки, Зоки, со тебе сме“. Обраќајќи им се на присутните, Шекеринска рече: „Ова што му се случува денес на Зоран, утре може да му се случи на секој граѓанин на Македонија. Нема да дозволиме тие да одат курбан за власта да ја ск��ие вистината дека по години лаги реши да прави коалиција со ДУИ“. Таа ги повика учесниците на протестот да останат пред судот и упати повик и до останатите граѓани да се приклучат на протестот за спас на демократијата во Македонија. Меѓу насобраните сопартијци на Заев беше и експремиерот Валдо Бучковски, кој се присети на една слична епизода, кога и самиот беше приведен на распит во истиот суд. „Имам нагон за повраќање. Сето ова станува толку одвратно што се губат и минималните шанси во вториот мандат Груевски да биде поинаков“, рече во изјавата за „Утрински весник“ Бучковски.

„Ова е катастрофа за Македонија, не само за Заев. И во нашата држава постојат граѓани кои мислат поинаку од Груевски, кој не' скара со половина Европа и државата ја води кон пропаст“, гласно коментираа Димче Ташков од Скопје и Здравко Коцев од Штип.

Според соопштението на МВР, истрагата се води против раководителот на Секторот за урбанизам, комунални работи, заштита на животна средина и ЛЕР при Општина Струмица и член на Комисијата за јавни набавки С.Д., К.П. - раководител на Секторот за правни, административни, општи работи и јавни дејности во Општината, Н.Г. - раководител на Одделението за административна поддршка на градоначалникот, И.Т. - општински урбанистички инспектор и овластен градежен инспектор и Г.К. - основач и управител на ДГТУ „Де лукс инженеринг“ ДОО Струмица и основач на ДГПТУ „Сим инженеринг“ ДООЕЛ Струмица. Приведените се товарат дека во зависност од овластувањата што ги имале, злоупотребата ја извршиле така што најпрво спровеле јавен тендер за избор на соинвеститор за градење на Трговскиот деловен центар на локација на поранешниот градски пазар во Струмица. Се наведува дека земјиштето на кое е изграден трговскиот деловен центар е во сопственост на Република Македонија, чии корисници се повеќе правни и физички лица, а за кое се во тек постапките за денационализација.

Наспроти ваквиот обвинителен акт, сограѓаните на Заев не го криеја револтот кон власта, порачувајќи: „Им пречеше нашиот градоначалник зашто е подобар од Груевски. Тој од Струмица направи прекрасно место за живеење, мал Париз, и тоа е она што власта не може да му го прости“. Тие останаа пред судот до доцните попладневни часови, чекајќи го исходот од распитот.